Еурофарм Пелистер го очекува нов натпревар од Лигата на Европа против словенечкиот претставник Тримо Требње.
Битолчани загубија на првиот дуел на гости во Љубљана, а левото крило Бојан Маџовски вели дека со 13 загубени топки не се добива натпревар.
„Во Словенија одигравме еден од нашите најслаби натпревари. Иако создававме позиции и шанси, имавме голем проблем со реализацијата. Противникот не нè изненади со ништо од тоа што го подготвувавме, па дури и можам да кажам дека го спречивме нивното најсилно оружје – транзиција и брзата игра. Сепак, со 13 промашени зицери, тешко се добива натпревар“, вели Маџовски.
Слично како и лани, така и сега, битолчани губат натпревари во финишот, но Маџовски се надева дека со една победа, екипата ќе ја врати самодовербата.
„И минатата, а и оваа сезона се соочуваме што и на добиени натпревари, не ги освојуваме бодовите. Веруваме дека и тоа ќе го надминеме. Го оставаме последниот натпревар зад нас, се спремаме и во вторник се надеваме дека ќе излеземе како победници. Ни треба една победа да се крене екипата, да ја врати самодовербата. Иако можам да кажам дека атмосферата е добра во клубот, тренираме и се спремаме одлично, но ни треба таа една победа да ја вратиме самодовербата“, завршува Маџовски.
Натпреварот меѓу Еурофарм Пелистер и Тримо Требње се игра на 8 декември од 20:45 часот во салата „Боро Чурлевски“.
ПОВРЗАНИ ВЕСТИ
