По долги години Драчево се враќа на македонската ракометна мапа со тим во сениорска конкуренција. Сигурно се сеќавате кога овој тим беше дел од Суперлигата под водство на Игор Котевски, а играа Настески, Трпевски, Андоновски, Тренчевски, Георгиевски…
Сега Драчево започнува од Првата лига под водство на некогашниот ракометар на Вардар, Велимир Настески, а тимот веќе донесе и четири засилувања.
Нов голман на екипата е Борче Ангеловски, по една година пауза на ракометот му се враќа искусниот Бобан Андовски, кој може да игра на сите бековски позиции. Тука е средниот бек Александар Димовски, кој беше дел од Вардар Јуниор, Работнички и Бутел Скопје, а доаѓа и пикерот Бобан Ристевски.
Тимот, кој има голема поддршка од Општина Кисела Вода, своите натпревари ќе ги игра во оваа населба во салата „Круме Кепески“, а ривалите во групите ќе ги дознае на утрешната ждрепка во РФМ.