В недела очите на македонската спортска јавност ќе бидат свртени кон СЦ „Јане Сандански“ и најголемото дерби на македонскиот ракомет.
Вардар и Еурофарм Пелистер ќе го имаат прво соочување, а тоа ќе мине со арбитража на Димитар Митревски и Благојче Тодоровски од Битола.
Од македонскиот шампион се обратија и ги поддржаа официјалните лица, посакувајќи се да помине во спортска атмосфера.
„Пред неделното ракометно дерби со Еурофарм Пелистер, кое е најголемото ракометно ривалство во Македонија, и по делегирањето на официјалните лица на натпреварот ракометниот клуб Вардар сака да даде поддршка на спортскиот аспект на натпреварот.
Вардар верува дека целиот меч ќе мине во крајно коректна и спортска атмосфера, и официјалните лица делегирани за овој меч ќе бидат на висината на својата задача, исто како и сите други учесници на мечот.Македонија секогаш имала квалитетни судии, а меѓу нив се двојката Митревски – Тодоровски кои ќе бидат дел од нашиот ракометен дуел. Со своето знаење, искуство и интегритет многупати досега покажале дека се зрели за вакви натпревари. Ние ќе се обидеме да им овозможиме да имаат што е можно полесна задача.
На дерби средбите на кои играл Вардар секогаш правдата ја делеле најдобрите, најчесто Николов – Начевски, моментно најдобриот светски судиски пар. За нас никогаш не било важно кој ја дели правдата, и кој е делегат, и затоа сакаме да им дадеме целосна поддршка на официјалните лица и да им посакаме успешен натпревар, каде треба да победи моментно подобрата екипа.
Ќе се бориме за секоја топка и на секој сантиметар од теренот. Треба да победи спортот и ракометот.
Од навивачите на двата тима очекуваме подеднакво спортско однесување на трибините, и заеднички да се направи вистинска ракометна фешта.
Ве очекуваме во недела во СЦ „Јане Сандански““, се вели во обраќањето на шампионот.
Натпреварот меѓу Вардар и Еурофарм Пелистер се игра в недела во СЦ „Јане Сандански“ со почеток во 18:00 часот.
Комити со пиво, бургери и ди-џеј ќе се загреваат за „двобојот“ со Чкембари
ПОВРЗАНИ ВЕСТИ
