Бутел Скопје по триумфот над Струга, ја забележа втората победа во серија во суперлигашката конкуренција, откако на домашен терен славеше против составот на Вардар Неготино со 31-24.
Домашните тргнаа фуриозно и отворија со водство од 6-1, па најавија дека гостите нема што да бараат на овој меч. Првиот дел мина во доминација на бутелци, иако во финишот Вардар Неготино ја преполови негативата, 16-13.
Опуштањето во вториот дел скапо можеше да ги чини домаќините. Избраниците на Грчевски имаа „црна дупка“ во играта и неготинци успеаја да израмнат на 18-18 во вториот дел.
Иако домашните повторно го преземаа водството, тоа не им гарантираше мирна завршница. Водеа со два или три разлика, а по 26-22, Ташев погоди за 26-24 на седум минути до крајот.
Тука како да застанаа неготинци и не погодија до крајот на мечот, а домашните стрелаа пет пати за нова суперлигашка победа. Најдобри стрелци беа Стефан Крстевски со 11 гола кај Бутел Скопје и Ѓорѓи Ташев со шест кај Вардар Неготино.
ПОВРЗАНИ ВЕСТИ
