ЖРК Спартак продолжува со јасни потези на пазарот пред новата сезона. Клубот од Кисела Вода ја продолжи соработката со пивотменката Сара Цветановска, најдобриот пивот за сезоната 2025/2026 во изборот на 24ракомет. Таа е играч која со својата борбеност на линијата од шест метри и стабилност во двата правци беше важен дел од тимот во изминатиот период.
Цветановска е ракометарка од Куманово и важи за пивот кој знае да „јаде“ дуели, да отвора простор за бековите и да носи цврстина во одбраната. Во кариерата настапувала и за Куманово и Металург Автокоманда, а зад себе има и европски настапи, што е дополнителен плус за Спартак во сезона во која клубот сака уште поголема конкурентност и повисоки цели.
Паралелно со задржувањето на Цветановска, Спартак го засили и бековскиот дел од екипата. Ново име во тимот е Нина Неделковска, која доаѓа од ЖРК Вардар. Неделковска игра на позицијата среден бек и во јавноста одамна е препознаена како ракометарка која има квалитет и „материјал“ во себе, а во претходните сезони важеше за една од најефикасните во својата генерација. Има постигнато 46 гола за Вардар сезонава во Супер лигата.
Со овој потег, Спартак јасно покажува дека сака поквалитетна ширина и повеќе опции во ротацијата. Задржувањето на сигурен пивот и носењето на креативен среден бек се потег што може да донесе поголема стабилност и во напад и во одбрана, а тимот од Кисела Вода добива јасен правец – да биде уште поопасен и поконкурентен во сезоната што следува.
Тимот се засили и со тренерот Симе Симовски, кој сега ќе прави тим со кој ќе се напаѓа врвот на табелата и излез во Европа.
____________________________________________________________________________________________________
Добивај директно вести на твојот мобилен телефон, приклучи се на Viber групата на семејството на 24ракомет. Со еден клик до сите ракометни вести.
_____________________________________________________________________________________________________
