Штотуку завршената 2024 година не ни донесе (пре)многу радости на репрезентативно ниво, ако го изземеме одличниот настап на младинската репрезентација на ЕП во Словенија. Во 2025 година, четири репрезентативни селекции - сениорите, младинците, младинките и кадетките, веќе обезбедија место на големите натпреварувања, сениорките ќе имаат шанса преку бараж да дојдат до СП 2025, додека кадетите единствено преку вајлд-карта би можеле да се најдат на СП 2025 во Египет.
Од 15 јануари не очекува настапот на сениорите на СП во Хрватска, Данска и Норвешка, а во март и продолжението на квалификациите за ЕП 2026, односно двомечот со Словенија, како и по еден дуел со Литванија и Естонија.
Сениорките ги чека бараж двомеч за СП 2025 против Полска, а од октомври старт на квалификациите за ЕП 2026, кое за првпат ќе се игра во пет држави. Избраничките на Кристијан Грчевски ќе ги дознаат ривалите во март.
Од младинските селекции, младинците ќе настапат на СП 2025 во Полска, додека кадетките и младинките ќе бидат дел од ЕП 2025 во Црна Гора.
На купска сцена, Еурофарм Пелистер го очекува продолжението од Лигата на шампионите, додека „сино-белите“ од Автокоманда во машка и Чаир во женска конкуренција ги чекаат осминафиналните средби од Европскиот Куп за да испишат нова убава страници во клупските истории.
На македонските терени ќе се бијат битки за титулите од февруари во првенствата и во Купот на Мaкедонија.
Тука се стандардните натпревари во Супер, Женската и Првата лига, како и натпреварите во младинските категории, па нема да ни фалат ракометни возбудувања и во 2025 година.
