Еурофарм Пелистер ја зајакнува својата спортска платформа пред новата сезона. Ракометниот клуб денеска официјално потпиша спонзорски договор со групација која во клубот влегува преку три компании – „Пелистерка“, „ЗК Пелагонија“ и „Здравје Радово“, што во Битола се оценува како значаен поттик за стабилност и амбиции на битолскиот ракометен бренд.
Претседателот на клубот, Зоран Стерјев, истакна дека во изминатиот период се работело интензивно на продолжување и зајакнување на ракометната платформа заедно со Општина Битола, но и на привлекување нови партнери кои ќе го поддржат клубот во остварувањето на целите.
„Ќе помогнат во наредниот период клубот да остане на нивото на кое што е и овие изминати години, активно да се бориме за највисоките дострели, во националното првенство за освојување на шампионатот на нашата држава и се разбира националниот куп, а на меѓународен план колку е можно да стигнеме подалеку во некои од европските натпреварувања“, рече Стерјев.
Првиот човек на Пелистер изрази благодарност до сопственикот на групацијата, Цветан Панделевски, и неговиот тим за, како што нагласи, разбирањето кон клубот и желбата да се помогне за заеднички да се направи повеќе.
На настанот се обрати и градоначалникот на Битола, Тони Коњановски, кој порача дека успешната приказна на Еурофарм Пелистер и Општина Битола продолжува и понатаму, а новото партнерство го оцени како „додадена вредност“ што ја зајакнува стабилноста и спортската платформа.
„Вие сте брендот кој го осветли образот и на општината и на градот и на државата во изминатиов период. Со ова денеска објавување, официјализирање на овој партнерски однос, ова спонзорство, значи многу, значи една стабилност која ќе ја зајакне спортската платформа меѓу Општина Битола и „Еурофарм“ и нов поттик за вас секако како спортисти, за градот уште посилно и во едни стабилни услови да продолжиме понатаму да го градиме името на Пелистер“, рече Коњановски.
___________________________________________________________________________________________________
Добивај директно вести на твојот мобилен телефон, приклучи се на Viber групата на семејството на 24ракомет. Со еден клик до сите ракометни вести.
_____________________________________________________________________________________________________
