Откако беа објавени групите за 54. издание на традиционалниот Струшки турнир, дефиниран е и распоредот на натпреварите.

На 12 август, турнирот ќе почне со дуелот меѓу Вардар и Прилеп од 18:30 часот, пред да се случи свеченото отворање.

Потоа, од 21:15 часот ќе се одигра езерскиот двобој меѓу бранителот на трофејот – Охрид и домаќинот Струга.

На 13 и 14 август се натпреварите по групите, додека на 15 август се завршните натпревари – финалето ќе стартува од 20:30 часот.

Распоред на натпревари:

12 август
18:30 Вардар – Прилеп
20:00 Свечено отворање
21:15 Струга – Охрид

13 август
18:30 Прилеп – Бутел Скопје
20:30 Охрид – Дубочица Лесковац

14 август
18:30 Струга – Дубочица Лесковац
20:30 Бутел Скопје – Вардар

15 август
10:00 за петто место
18:30 за трето место
20:30 финале

Тимот на Пелистер активно работи на формирање на играчкиот ростер за претстојната сезона во која ќе се натпреварува во суперлигашка конкуренција.

По голманката Ана Марија Горговска, која дојде од Куманово, Алексија Ангелковска која дојде од Атлетик и Еџе Сејадин која дојде од Стружанка, битолчанки кон првиот тим приклучија талентирана ракометарка од младинскиот тим.

Станува збор за левиот бек Стефанија Ангеловска, која досега беше дел од младинскиот состав на битолчанки, но во новата сезона ќе има можност да се покаже кај Моника Талевска.

Битолчанки претходно ја продолжија соработката со Невена Бундоска и со Ана Стојчевска, а се разделија со голманката Симона Спиркоска и со левиот бек Анастасија Тодоровска.

Машката кадетска репрезентација на Македонија обезбеди место во разигрувањето за пласман од 9 до 16 позиција на Европското првенство во Србија, а тоа значи дека може без притисок околу опстанок да ги одигра следните три меча.

Но останува борбата место кое води на Мундијалот наредната година, а за тоа ќе биде доволно само една победа на преостанатите три средби.

Утре од 12:00 часот, избраниците на Горан Кузманоски ќе се соочат со селекцијата на Фарски Острови.

Незгодните „овчари“ во групната фаза загубија само од Шпанија со 37-32, ремизираа со Австрија 26-26, а ја совладаа само Финска со 38-31.

Во групата за разигрување за пласман, Фараните ремизираа со Полска 31-31 и потоа загубија од Данска со 32-27.

Ако Македонија слави против Фарски Острови, тогаш ќе оди во битки од 9 до 12 со победникот од средбата меѓу Португалија и Шведска, во спротивно оди во разигрување со поразениот од тој двобој за пласман од 13 до 16 место.

Европското првенство, кадети, разигрување 9-16 место:

Фарски Острови – Македонија
Србија – Австрија
Португалија – Шведска
Полска – Израел

Машката кадетска репрезентација на Македонија ја исполни главната цел на Европското првенство во Србија. Избраниците на Горан Кузманоски ќе разигруваат за пласман од 9. до 16. место, а воедно се на чекор до Светското првенство во 2027 година и останување во А-дивизијата за младинското Европско првенство во 2028 година. Европскиот шампионат за ракометари до 18 години е квалификациски за Светското првенство во 2027 година.

Македонија најпрво ја заврши својата работа со победата над Турција од 29-27. Иако триумфот беше остварен со само два гола разлика, по расплетот на останатите натпревари стана јасно дека македонската селекција го обезбедила местото во ТОП 16. На дуелот со Турција голманот Ѓорѓи Николовски забележа 14 одбрани, додека Бобан Поповски постигна девет гола.

Селекторот Кузманоски истакна дека пласманот е резултат на јасно поставената цел пред почетокот на првенството.

„Амбицијата и целта на оваа репрезентација беа да обезбедиме директен пласман на Светското првенство во 2027 година и да останеме во А-дивизијата за следното младинско Европско првенство, кое ќе се одржи во 2028 година. Тоа го остваривме“, изјави Кузманоски.

Македонија имаше исклучително тешка задача во првата фаза, во која за противници ги имаше Словенија, Франција и Шведска. Кузманоски нагласи дека, и покрај силната група и фактот што репрезентацијата не пренесе бодови, играчите успеале да го пронајдат патот до посакуваниот пласман.

„Не беше лесно, бидејќи во првата група игравме против три силни репрезентации. Не успеавме да пренесеме бод во следната фаза, но таму успеавме да оствариме подобра гол-разлика и на тој начин да бидеме меѓу најдобро пласираните селекции.“

Со обезбедениот пласман меѓу најдобрите 16, притисокот е намален, но селекторот не сака неговите ракометари да застанат. Македонија ја очекуваат уште три натпревари во кои ќе се обиде да стигне до што повисока позиција.

„Сега ни преостанува разигрувањето за пласман од 9. до 16. место. Имаме уште три натпревари и, без разлика што веќе сме на чекор до СП, ќе се обидеме да завршиме на што повисока позиција. Оваа генерација заслужува да биде меѓу репрезентациите што ќе се борат за пласман од 9. до 16. место“, вели Кузманоски.

Македонскиот селектор смета дека настапите на големите натпреварувања се клучни за развојот на оваа генерација, од која во иднина очекува повеќе ракометари да стигнат и до сениорската репрезентација.

„Сакаме да продолжиме со континуитетот на настапи на европските првенства. Ова е генерацијата која минатата година настапи на младинските Олимписки игри. Се гледа дека за една година играчите пораснаа и созреаја, но треба уште да напредуваат и да се развиваат. Токму овој континуитет ќе им помогне еден ден поголемиот дел од нив да станат и членови на А-репрезентацијата.“

Кузманоски им честиташе на своите избраници за досега оствареното, но потенцираше дека пред репрезентацијата се нови тешки натпревари.

„Можам само да им честитам. Сепак, ништо не е завршено и имаме уште многу да играме. Пласманот е целосно заслужен, а во продолжение нè очекуваат тешки противници. Ќе имаме можност да се надигруваме со квалитетни селекции и да покажеме колку можеме“, заврши Кузманоски.

_________________________________________________________________________________________
▶▶▶  Добивај директно РАКОМЕТНИ ВЕСТИ вести на твојот мобилен телефон, приклучи се на Viber групата на семејството на 24Ракомет. Со еден клик до сите вести.
_____________________________________________________________________________________________________ 

Машката кадетска репрезентација на Македонија ќе разигрува за пласман од 9 до 12 место на Европското првенство, откако ја оствари главната цел на шампионатот – обезбеди место на кадетското Светско првенство во 2027 година и на младинското Европско првенство во 2028 година.

По важната победа над Фарските Острови, избраниците на Горан Кузманоски сега без голем притисок ќе ги дочекаат последните два натпревари на турнирот. Првиот предизвик е утре од 12 часот против Португалија.

Ако Македонија слави, ќе игра за 9 место против победникот од дуелот меѓу Австрија и Израел. Во случај на пораз, нашите кадети ќе разигруваат за 11 позиција против поразениот од истиот натпревар.

Селекторот Горан Кузманоски по триумфот над Фарските Острови истакна дека Македонија одиграла зрел и квалитетен натпревар, особено ако се знае колку голем влог носеше таа средба.

„По еден неизвесен натпревар против Фарските Острови, кој беше исклучително важен за нас, пред сè во борбата за пласман од деветтото до дванаесеттото место, а со тоа и за обезбедување директен пласман на Светското првенство, можам да кажам дека одигравме одличен натпревар“, изјави Кузманоски.

Македонија во првиот дел одигра дисциплинирано и тактички зрело. Одбраната добро одговори на најсилното оружје на Фарските Острови, играта „седум на шест“, како и на ситуациите со бројчана предност.

„Во првото полувреме игравме многу колективно. Во одбраната бевме тактички одлично подготвени за нивната игра ‘седум на шест’, како и за ситуациите кога имаа бројчана предност ‘седум на пет’, што е нивното најсилно оружје. Одбраната функционираше одлично, а во нападот бевме трпеливи, знаевме што сакаме и во секој момент го контролиравме резултатот и текот на натпреварот“, додаде селекторот.

Во вториот дел Македонија имаше тежок период, особено по директниот црвен картон на Петар Николовски. Подоцна црвен картон доби и Стефан Ѓорѓиевски, но кадетите успеаја да останат стабилни во најважните моменти.

▶▶▶ Приклучи се на VIBER – https://abit.ly/viber-24rakomet
Добивај директно РАКОМЕТНИ ВЕСТИ на твојот мобилен телефон 📲.
Со еден клик до сите вести. 🤾

„Во второто полувреме имавме мал пад во играта по директниот црвен картон на Петар Николовски. Сепак, во клучните моменти успеавме повторно да се вратиме, да создадеме предност од три гола и, иако добивме уште еден директен црвен картон, овој пат за Стефан Ѓорѓиевски, нашиот среден бек, на крајот заслужено стигнавме до победата“, истакна Кузманоски.

Селекторот посочи дека натпреварот бил тежок и поради големиот број исклучувања, но нагласи дека критериумот бил строг и на двете страни.

„Би сакал да истакнам дека на овој натпревар имаше многу исклучувања. Судиската двојка од Италија имаше доста строги критериуми и исклучувањата беа на двете страни, не само за Македонија. И Фарските Острови имаа голем број исклучувања. Но, на крајот покажавме карактер“, рече Кузманоски.

За Македонија ова беше шести натпревар во низа на шампионатот, но и покрај заморот, кадетите физички издржаа и стигнаа до победа што носи голема вредност за оваа генерација.

„Ова ни беше шести натпревар по ред, физички се држевме на високо ниво и заслужено извојувавме победа“, додаде македонскиот селектор.

Следен ривал е Португалија, селекција која за малку остана без четвртфинале. Кузманоски очекува тежок натпревар, но вели дека Македонија ќе влезе без притисок и со желба да направи уште еден исчекор.

„Сега нè очекува уште еден тежок натпревар против Португалија. Немаме многу време за подготовка, практично само уште половина ден. Играме против репрезентација која за нијанса остана без пласман во четвртфиналето. Станува збор за извонредна селекција, земја која континуирано вложува во развојот на младинските категории“, вели Кузманоски.

Македонија веќе ја оствари главната задача, но генерацијата има шанса турнирот да го заврши со уште подобар пласман и уште една силна победа.

„Немаме што да загубиме. Ќе излеземе на терен со желба за победа, како и на секој претходен натпревар. Верувам дека тоа би бил уште еден голем чекор напред за оваа репрезентација“, заврши селекторот.

Пласманот на следните големи натпреварувања е веќе обезбеден, но дуелот со Португалија е нова можност оваа генерација да потврди дека има потенцијал за уште поголеми резултати.

❗❗  Следете не на нашите социјални мрежи, на Facebook, и на Instagram и бидете дел од Viber заедницата на 24Ракомет – добивајте ги сите информации веднаш на вашиот телефон…