Започна второто по квалитет клупско европско натпреварување, Лигата на Европа. Досега беа одиграни пет натпревари од кои поголемиот дел беа многу израмнети и интересни.
Дуелот од групата на Еурофарм Пелистер, помеѓу Кадетен Шафхаузен и ГОГ беше максимално израмнет и драматичен до самиот крај, а победата сепак им припадна на домаќините. Кадетен славеше 29:28 откако на две минути пред крајот имаше негатива, но со голот на Габор Часар во последната секунда ги освои бодовите. И по првиот дел беше еден предност за домаќините 14:13.
Хрватскиот претставник Нексе имаше одлично издание на гостувањето во Шведска против Алингсас и славеше победа 23:27 после голема борба во текот на целиот натпревар. Првиот дел беше доста израмнет, но Нексе замина на одмор со минимална предност 12:13. И вториот дел продолжи во ист ритам, а Нексе во финишот подобро се снајде, направи предност од четири гола и стигна до победата.
Бундеслигашот Магдебург имаше убедливо издание на гостувањето кај Бешикташ и славеше лесна победа со резултат 23:41. Уште по првиот дел се беше решено кога гостите имаа висока предност, 8:20. Вториот дел беше рутинско одработување за први бодови на Магдебург.
Интересен и неизвесен натпревар одиграа екипите на Динамо Букурешт и Спортинг, а победата им припадна на ракометарите на тимот од Португалија со 25:27. Спортинг до првите бодови стигна со за нијанса подобро издание во второто полувреме од противникот откако на полувреме имаше предност од еден гол 15:16.
Лига на Европа, 1. коло, Резултати
Алингсас – Нексе 23:27 (12:13)
Бешикташ – Магдебург 23:41 (8:20)
Динамо Букурешт – Спортинг 25:27 (15:16)
Кадетен Шафхаузен – ГОГ 29:28 (14:13)
Тулуз – Металург 33:29 (18:15)
ПОВРЗАНИ ВЕСТИ
