Ракометарките на Чаир со максимален ефект, 10 од 10, го завршија настапот во регуларниот дел од Женската лига.

Чаир во последното коло за ривал го имаше Астибо од Штип и одработи според посакуваното триумфирајќи со 30:27.

Астибо се покажа како добар ривал, во првиот дел на моменти водеше со 1-2 гола разлика, а домашниот тим победата ја обезбеди со подобрата игра во вторите 30 минути.

Тренерот Љатифи поради европскиот настап овој викенд, не сакаше да ризикува многу, па така поголемиот број од првотимките се штедеа.

Одлична партија во дресот на Чаир имаше младата Рона Мифтари, која постигна 12 погодоци, седум додаде Биљана Дамчевска.

Кај поразениот табор, стандардно, прво име беше Марија Анчева со 13 погодоци, а ја следеше Елена Вучевска со девет.

Натпреварите меѓу Чаир и Колехио Де Гаиа во рамки од 3. коло од Европскиот Куп се играат в сабота и недела во Автокоманда со почеток од 16:00 часот.

Црногорскиот стратег Драган Аџиќ си поднесе оставка на тренерската позиција во словенечкиот првак Крим Меркатор.

По поразот од Мец во Лигата на шампионите на домашен терен, Аџиќ поднесе оставка, а истата беше прифатена од страна на раководството.

Иако Крим ја стартуваше одлично новата сезона во елитната конкуренција и запиша четири победи, сепак потоа доживеа три порази во серија, од кои два дома. Крим загуби дома од ЧСМ Букурешт и Мец, а беше поразен и на гости кај Ференцварош.

Во следното коло словенечкиот тим ќе гостува кај фаворитот Мец, па нема да биде чудо ако по осум кола остане на половичен биланс. Сепак и покрај тоа Крим останува на четвртото место на табелата со осум бода, кое води во осминафиналето.

Дали заминувањето од Крим ќе влијае на неговата работа во женската репрезентација на Словенија останува да видиме.

Австрискиот град Грац ќе биде домаќин на завршниот турнир во Лигата на Европа во женска конкуренција.

Трета сезона по ред, Грац ќе ги собере најдобрите четири екипи во второто по ранг европско клупско натпреварување на 3 и 4 мај.

„Рајфајзен Арена“ во Грац ќе биде домаќин на четири меча, кои од трибините ќе ги гледаат најмалку по 3.000 гледачи.

Македонски претставник во Лигата на Европа оваа сезона беше Ѓорче Петров, но шампионот беше елиминиран во второто коло.

По одигрувањето на реваншите од третото коло ќе бидат познати патниците во групната фаза каде ќе играат 16 екипи.

Минатиот викенд се одиграа првите натпревари од 3 квалификациско коло во Лигата на Европа. По елиминацијата на Ѓорче Петров, претставнички од Македонија останаа Зорица Десподовска од полскиот Кобержице и Андреа Седлоска од хрватската Локомотива Загреб.

Кобержице загуби минимално на гости кај Ларвик и ќе има шанса во реваншот да ја надомести негативата за пласман во групите од Лигата на Европа. Десподовска се уште се рехабилитира и нема заиграно сезонава.

Локомотива Загреб загуби дома од шпанскиот Елче, а македонската репрезентативка Седлоска немаше погодоци на оваа средба. Со оглед на високиот пораз, тешка ќе биде мисијата за место во групите на Локомотива Загреб и Седлоска.

Пласман во групите обезбеди норвешката Сола, која два пати играше дома со швајцарскиот Брул и два пати славеше убедливо.

Лига на Европа, 3 квалификациско коло, резултати:

Савехоф (Шведска) – Заглебје (Полска) 30-28
Сола (Норвешка) – Брул (Швајцарија) 33-23, 37-32
Ларвик (Норвешка) – Кобержице (Полска) 30-29
Локомотива Загреб (Хрватска) – Елче (Шпанија) 21-28
Дижон (Франција) – Зрињски (Хрватска) 43-12
Борусија Дортмунд (Германија) – Бањик Мост (Чешка) 36-32
Турингер (Германија) – Вац (Унгарија) 34-22
Бломберг (Германија) – Мецинген (Германија) 30-21
Валчеа (Романија) – Дебрецин (Унгарија) 33-31
Хорс (Шведска) – Париз (Франција) 25-30
Лублин (Полска) – Бера Бера (Шпанија) 23-19

Во Европскиот Куп, поголем број од дуелите од 3 коло ќе бидат одиграни следниот викенд, меѓу кои и оние на Чаир, кој дома два пати ќе го пречека португалскиот тим Колехио Де Гаиа.

Пласман во осминафиналето обезбедија шпанскиот Порињо и словачката Јувента Михаловце. Тимот од Михаловце го елиминира босанскиот Груде на Симона Василева со две убедливи победи. Македонската интернационалка постигна три гола на втората средба.

Српската Јагодина, каде што играат Сара Стефаноска и Јана Равојска, убедливо беше поразен од грчкиот Јонијас со 27-20. Стефаноска беше најдобар стрелец во српскиот тим со шест гола, но ќе имаат тешка задача во реваншот да ја надминат негативата и да обезбедат место во осминафиналето.

Европски Куп, 3 коло, резултати:

Порињо (Шпанија) – Бурса (Турција) 34-26, 24-26
Ускудар (Турција) – Мадеира (Португалија) 25-28
Гњезно (Полска) – Ериче (Италија) 30-18
Валур (Србија) – Кристијанштад (Шведска) 27-24
Малага (Шпанија) – Сао Педро Сул (Португалија) 32-15
Јувента Михаловце (Словачка) – Груде (Босна и Херцеговина) 44-20, 39-22
Јонијас (Грција) – Јагодина (Србија) 27-20 
Дуделанж (Луксембург) – Унирек (Холандија) 22-30
Железничар Инџија (Србија) – Ваљадолид (Шпанија) 20-32
Истогу (Косово) – Кинжварт (Чешка) 30-44

Селекторот на женската репрезентација на Унгарија, Владимир Головин, го објави списокот на ракометарки за Европското првенство што ќе стартува на 28 ноември.

Головин ќе смета на 19 ракометарки, а тука се искусните голманки Бланка Биро и Кинга Јанурик, крилата Надин Шатцл, Доротеја Фалувеги и Викторија Лукач, како и младите бекови Петра Симон, Грета Качор, Катрин Клујбер…

Избраничките на Головин ќе имаат две контролни средби пред настапот на ЕП, против Словачка на 22 ноември и против Украина на 24 ноември.

Унгарија е во групата А што ќе се игра во Дебрецин, заедно со Македонија, Шведска и Турција, а средбата меѓу домаќинот на ЕП и нашите ракометарки е на 2 декември од 18:00 часот.