Ракометарите на Куманово имаа победнички старт на тешката битка за опстанок што ги чека шест екипи во елитната конкуренција. Избраниците на Љубиша Димковски го победија засилениот Радовиш со 24-19 со пресврт во второто полувреме. Клучен беше стартот на вториот дел, кога домашните ја направија клучната залиха. Лидер кон триумфот беше младинскиот репрезентативец Давид Димевски, кој беше нерешлива енигма за гостинската одбрана, а значајна улога имаше и голманот Христијан Михајловски.
Првото полувреме мина во израмнета игра во најголем дел, но во финишот гостите успеаја да поведат со два гола и таквата разлика ја одржуваа до паузата, 12-10. На стартот на вториот дел одлично бранеше домашниот голман Михајловски, одбраната на Куманово исто така беше поцврста и радовишани не можеа да го видат голот цели 13 минути.
Во меѓувреме домаќините ги казнуваа сите грешки, Котевски повика тајм-аут но ништо значајно не се промени на теренот и Куманово со серија од 8-0 отиде на плус шест, 18-12. Нивната серија конечно ја прекина Постолов, а потоа погоди и Јанковски за 18-14, па домашниот стратег Димковски ги викна своите избраници за совети и минута одмор.
Искусниот Паунов фати неколку топки и Радовиш на три минути до крајот намали на минус три, 22-19, но и Михајловски одбрани на спротивната страна, а точка на мечот стави Димевски. Младинскиот репрезентативец беше најдобар стрелец со 14 голови, а пет додаде Матачиќ. Во составот на Радовиш се истакнаа Илиев со пет и Јанковски со четири погодоци.
Во следното коло Куманово ќе гостува кај Струга, а Радовиш оди пак на гости, овојпат во Велес кај Борец ФЛ.
