Денеска се играат три натпревари од последното коло во групната фаза на меморијалниот турнир „Крсте Андоновски“.
Најинтересни ќе бидат двата меча од 18:45 и од 21:00 часот, кога македонските претставници Охрид и Вардар ќе имаат „еден на еден“ битки за место во финалето.
Пред Вардар стои словенечкиот Тримо Требње, а на македонскиот шампион и бод ќе му биде доволен за прво место во групата и пласман во финалето. „Црвено-црните“ имаат многу подобра гол-разлика од +18, додека словенечкиот состав има +6.
Ист е случајот и со Охрид. На „гладијаторите“, кои првпат во клупската историја ќе играат против хрватскиот великан Загреб, и бод ќе им биде доволен за финале. Охрид има гол-разлика +14, додека Загреб е на +13.
Избраниците на Борис Ројевиќ за првпат на турнирот ќе бидат со комплетниот ростер на дуел, додека кај Загреб ќе недостига само Ивано Павловиќ.
Претходно од 16:30 часот, програмата ќе ја отворат екипите на Нексе Нашице и Олимпијакос.
Ако македонските екипи обезбедат место во финалето, тогаш на турнирот „Крсте Андоновски“ ќе гледаме реприза од финалето на Струшкиот турнир, каде Охрид славеше против Вардар со 31-30.
Распоред на натпревари:
16:30 НЕКСЕ – ОЛИМПИЈАКОС
18:45 ВАРДАР – ТРИМО ТРЕБЊЕ
21:00 ОХРИД – ЗАГРЕБ
