Од 18 до 22 август СРЦ „Билјанини Извори“ ќе биде домаќин на петтото, јубилејно издание на меѓународниот турнир „Крсте Андоновски“. Осум екипи од шест земји, меѓу кои Вардар, Загреб, Охрид, Војводина, Нексе и Олимпијакос, најавуваат пет дена квалитетен ракомет во Охрид.
По Струга, ракометната приказна покрај Охридското Езеро продолжува во Охрид. Од 18 до 22 август во СРЦ „Билјанини Извори“ ќе се одржи петтото, јубилејно издание на меѓународниот ракометен турнир „Крсте Андоновски“, кој за само неколку години изгради свое место на летната ракометна мапа.
Од првото издание во 2022 година, турнирот постојано растеше. Растеше бројот на странски екипи, квалитетот на учесниците, интересот кај публиката, но и значењето што го има турнирот за клубовите во завршниот дел од подготовките.
Годинава во Охрид ќе има осум екипи од шест земји. Македонија ќе ја претставуваат домаќинот Охрид и Вардар, од Хрватска доаѓаат Загреб и Нексе, Србија ќе ја претставува Војводина, од Грција пристигнува Олимпијакос, од Словенија e Тримо Требње, а посебен гостин ќе биде младинската репрезентација на Египет до 20 години.
Имињата сами по себе најавуваат каков турнир не очекува. Ќе има поранешни европски шампиони, клубови кои редовно настапуваат на европската сцена, национални шампиони, но и Охрид, кој во новата сезона влегува како освојувач на европски трофеј.
Охрид – домаќинот брани трофеј по историска сезона
За Охрид ова нема да биде само уште еден подготвителен турнир. „Гладијаторите“ ќе играат пред својата публика како актуелни победници на „Крсте Андоновски“. Минатото лето Охрид во финалето го совлада Еурофарм Пелистер со 31-26 и првпат го крена пехарот на домашниот турнир.
Оттогаш приказната на охридскиот клуб доби уште поголеми димензии. Зад Охрид е историска сезона во која беше финалист во Купот на Македонија и го освои ЕХФ Европскиот куп.
Предводени од Борис Ројевиќ, охриѓани летово веќе покажаа дека повторно имаат високи амбиции. По триумфот на турнирот во Струга, следува настап пред домашните навивачи и обид уште еднаш трофејот „Крсте Андоновски“ да остане во Охрид.
Противниците во групата ќе бидат Загреб, Војводина и Египет У20.
Вардар – двојната круна како обврска за новата сезона
Вториот македонски претставник е Вардар. „Црвено-црните“ зад себе имаат сезона во која повторно се вратија на врвот во Македонија и ја освоија двојната круна – првенството и Купот.
Во Европа стигнаа до четвртфиналето на Лига Европа, а сега пред Иван Чупиќ и неговите ракометари е нов предизвик. Турнирот во Охрид ќе биде една од најсилните проверки пред официјалните натпревари.
Вардар нема лесна група. Првиот ривал ќе биде Олимпијакос, потоа следуваат Нексе и Тримо Требње. Три различни ракометни школи и три натпревари кои треба да дадат многу одговори за формата на „црвено-црните“.
Загреб – европски великан доаѓа во „Билјанини Извори“
Едно од најзвучните имиња на годинашниот турнир е Загреб. Хрватскиот гигант со децении е дел од европската елита и редовен учесник во Лигата на шампионите. Зад името Загреб стои европска традиција, многу трофеи и долга листа на големи ракометари кои минале низ клубот.
Минатата сезона Загреб повторно беше дел од групната фаза на Лигата на шампионите, каде што играше против Барселона, ПСЖ, Магдебург, Висла Плоцк, ПИК Сегед, ГОГ и Еурофарм Пелистер.
За охридската публика неговото присуство ќе биде можност одблизу да види екипа која со години е синоним за хрватскиот клупски ракомет.
Војводина – традиција и победнички менталитет од Нови Сад
Од Србија пристигнува Војводина. Клубот од Нови Сад во последната деценија изгради доминација на домашната сцена и повторно стана препознатливо име и во Европа.
Војводина веќе има европски трофеј во својата понова историја, а турнирот во Охрид ќе биде нова можност за силни меѓународни натпревари пред почетокот на сезоната.
Уште во групата ќе има атрактивен дуел со Загреб, но и пресметка со домаќинот Охрид.
Нексе – добро познат гостин во Охрид
Нексе е екипа која охридската публика добро ја познава. Клубот од Нашице со години е меѓу водечките хрватски екипи и редовно е дел од европските натпреварувања.
Нексе настапуваше и на претходното издание на турнирот, кога го освои третото место по победата над Вардар со 28-26.
Годинава двете екипи повторно ќе се сретнат, но овојпат уште во групната фаза.
Олимпијакос – повторно во Охрид по европската пресметка
Интересен учесник ќе биде и Олимпијакос. Грчкиот клуб минатата сезона беше директен ривал на Охрид во ЕХФ Европскиот куп.
Двете екипи играа во четвртфиналето, а охриѓани победија и на двата натпревари – 31-26 во Грција и 25-24 во Охрид.
Сега Олимпијакос повторно доаѓа во „Билјанини Извори“, но овојпат само на пријателски натпревари.
Уште на отворањето ќе игра против Вардар, што треба да биде еден од најинтересните дуели во првиот ден.
Тримо Требње – словенечката школа повторно покрај езерото
Тримо Требње исто така не е непознат за македонската публика. Словенечкиот клуб во последните сезони редовно настапува во европските купови, а минатата сезона стигна до осминафиналето на ЕХФ Европскиот куп.
Словенечките екипи традиционално играат брз и дисциплиниран ракомет, па Тримо треба да биде уште еден сериозен тест за Вардар, Нексе и Олимпијакос.
Египет У20 – поинаков предизвик за европските клубови
Осмиот учесник не е клуб, туку репрезентација. Во Охрид доаѓа младинската селекција на Египет до 20 години, што на турнирот му дава дополнително меѓународно обележје.
Египет со години вложува многу во младинските категории, а дуелите со Загреб, Војводина и Охрид ќе бидат интересна споредба меѓу младински репрезентативен ракомет и искусни европски клубови.
Две групи, а во сабота битката за трофејот
Осумте учесници се поделени во две групи.
Група А: Охрид, Загреб, Војводина, Египет У20
Група Б: Вардар, Нексе, Олимпијакос, Тримо Требње
Турнирот почнува во вторник, 18 август, со натпреварот Вардар – Олимпијакос од 16:30 часот.
По групната фаза, сабота е резервирана за натпреварите за конечен пласман. Финалето е закажано за 20:00 часот.
24Ракомет со своја екипа во Охрид
24Ракомет и годинава ќе биде медиумски партнер на меѓународниот турнир „Крсте Андоновски“.
Нашата редакција ќе биде присутна во Охрид во текот на целиот турнир и секојдневно ќе ги пренесува сите најважни случувања од СРЦ „Билјанини Извори“.
Ќе следуваат претставувања на учесниците, нивните состави, засилувањата, тренерите и амбициите пред стартот на турнирот.
Од првиот до последниот натпревар ќе има извештаи, резултати, статистики, изјави од ракометарите и тренерите, интервјуа, фотографии, видеа, занимливости и приказни од теренот и надвор од него.
Како и во Струга, 24Ракомет ќе биде таму каде што се најважните ракометни настани.
Од 18 до 22 август – следната станица е Охрид.
Пет дена, осум екипи и многу силни натпревари во „Билјанини Извори“.
