Во новата сезона во Автокоманда ќе има нов тренер кој ќе го замени досегашниот кој повеќе сезони седеше на клупата. Откако обезбеди место во Супер лигата, управата на вториот тим од Автокоманда реши да го ангажира Никола Матлиески. Тој треба да го наследи досегашниот тренер Миле Бочкароски кој не доби продолжување на договорот.
„Витамините од Автокоманда“ зад себе имаат успешна сезона во Првата лига, во која ја остварија главната цел – камбек во елитното друштво. Тимот предводен од Бочкароски заврши како првопласиран, а промоцијата ја потврди со победата над Драчево Јуниор од 39-25 во последното коло.
На 24 натпревари, вториот тим од Автокоманда забележа 23 победи и само еден пораз, а единствениот неуспех беше минималниот пораз од Младост Богданци. Тоа беше доволно за убедливо прво место и враќање во Супер лигата по две сезони минати во понизок ранг.
Матлиески неодамна беше избран и за селектор на машката пионерска селекција на Македонија, генерација 2010 и помлади. Тоа е уште еден знак дека станува збор за тренер кој добро работи со млади ракометари, што целосно се вклопува во филозофијата на вториот тим од Автокоманда – собирање на сите квалитетни млади играчи.
Во тренерската кариера, Матлиески беше поврзан со повеќе клубови. Во 2017 година го презеде Пролет, каде дојде од Металург 2, а претходно како играч бил дел од истиот скопски клуб во периодот од 2005 до 2011 година. Подоцна повторно беше на клупата на Пролет. Беше дел и од проектот Голден Арт, каде беше избран како тренер со „селекторско педигре“.
Во 2023 година беше назначен и за тренер на Тиквеш, па неговото резиме опфаќа работа во различни средини, од развојни проекти до суперлигашки тимови со амбиции.
