Македонската репрезентативна голманка Јована Мицевска ќе ја продолжи кариерата во редовите на Црвена Звезда, пренесуваат „Моцарт Спорт“.
Актуелниот шампион на Србија веќе започна со формирање на тимот за следната сезона, а една од првите засилувања е токму 24-годишната Македонка. Белградскиот клуб има високи амбиции – одбрана на титулата во домашното првенство и пласман во групната фаза на Лигата на Европа.
За Мицевска ова ќе значи враќање на ракометните терени по една сезона пауза. Македонската голманка оваа пролет стана мајка, а сега е подготвена за ново поглавје во кариерата и нов предизвик во дресот на српскиот великан.
Скопјанката во досегашната кариера настапуваше за Вардар, Ница и Слатина, каде што го имаше својот последен интернационален ангажман.
Мицевска е добро познато име и во националниот тим. Таа е стандарден член на македонската репрезентација и настапи на ЕП 2022 и ЕП 2024.
