Денеска со натпреварот против Германија во Гумерсбах во „Швалбе Арена“, женската репрезентација на Македонија ќе ги започне квалификациите за Европското првенство 2026 што ќе се игра во пет држави.
Избраничките на Кристијан Грчевски вчера пристигнаа во германскиот град и го одработија тренингот пред мечот, а денеска од 19:30 ќе го одиграат натпреварот против домаќинот на претстојното СП.
Македонија и Германија играа досега девет пати во квалификациите или на големите натпреварувања, а Германките имаат осум триумфи, Македонија само еден. Последните две средби се одиграа во квалификациите за ЕП 2014, кога Германија славеше два пати со 23-21 и 31-16.
Во групата покрај Македонија и Германија се уште и селекциите на Словенија и Белгија. Словенките стартуваа со триумф против Белгија со 29-22, а в недела гостуваат во Битола во „Боро Чурлевски“.
Сите прво и второпласирани од шесте квалификациски групи ќе се пласираат на ЕП, како и најдоброто четири од шесте третопласирани.
Покрај дуелот во Германија, денеска ќе се одиграат уште пет средби од квалификациите за ЕП 2026, два меча од ЕХФ Евро Купот меѓу домаќините на ЕП, како и три дуели од Лигата на шампионите, односно два од ЕХФ Европскиот Куп.
На домашната сцена, шампионот Еурофарм Пелистер гостува кај Тиквеш во Кавадарци во заостанатиот натпревар од 7 коло во Супер лигата.
ДЕНЕСКА НА ТЕРЕНИТЕ:
18:00 ТИКВЕШ – ЕУРОФАРМ ПЕЛИСТЕР (МАКЕДОНИЈА)
18:00 ВОГОШЧА – БК46 (ЕХФ ЕВРОПСКИ КУП)
19:00 КОЊУХ ЖИВИНИЦЕ – Х71 (ЕХФ ЕВРОПСКИ КУП)
18:45 ЗАГРЕБ – ГОГ ГУДМЕ (ЛИГА НА ШАМПИОНИ)
20:45 ФУКСЕ БЕРЛИН – КОЛСТАД (ЛИГА НА ШАМПИОНИ)
20:34 СПОРТИНГ ЛИСАБОН – ВЕСПРЕМ (ЛИГА НА ШАМПИОНИ)
18:00 ПОЛСКА – СЛОВАЧКА (ЕХФ ЕВРО КУП)
19:00 УНГАРИЈА – ТУРЦИЈА (ЕХФ ЕВРО КУП)
18:00 СРБИЈА – ЛИТВАНИЈА (КВАЛИФИКАЦИИ ЕП)
18:10 ШВЕДСКА – УКРАИНА (КВАЛИФИКАЦИИ ЕП)
19:15 ШВАЈЦАРИЈА – БОСНА И ХЕРЦЕГОВИНА (КВАЛИФИКАЦИИ ЕП)
19:30 ГЕРМАНИЈА – МАКЕДОНИЈА (КВАЛИФИКАЦИИ ЕП)
19:30 ХОЛАНДИЈА – ИТАЛИЈА (КВАЛИФИКАЦИИ ЕП)
20:30 ШПАНИЈА – ГРЦИЈА (КВАЛИФИКАЦИИ ЕП)
