Ракометарите на Прилеп ја остварија втората победа и славеа на домашен терен во ефикасен натпревар против составот на Пролет со 35-33, откако и на паузата имаа плус четири, 18-14. Избраниците на Наум Танески водеа од првата до последната минута и целосно ја заслужија победата, иако имаа мал пад во играта и му дозволија на ривалот да ја намали негативата од седум на два во финишот.
Домашните отворија фуриозно со серија од 3-0, а потоа поведоа со високи 9-2, оставајќи го ривалот без решение за нивната агресивна игра. Пролет успеа да се врати во ритам кон крајот на првото полувреме и ја преполови разликата, но на паузата Прилеп замина со предност од 18-14.
Вториот дел донесе борба „гол за гол“. Пролет не се предаваше и на моменти се доближи на само минус три, а во последната минута намали и на 35-33, што беше и конечниот резултат. Сепак, домашните ракометари покажаа карактер и не дозволија изненадување.
Во следното коло Прилеп ќе му гостува на „сино-белиот“ тим во Автокоманда, додека Пролет ќе игра дома со Куманово.
