Финансиската криза во францускиот ракомет зема нова жртва. Женскиот клуб Лом, кој минатата сезона го оствари најголемиот успех во својата историја со петто место во Втората лига, е административно исфрлен во Третата лига, поради тешка финансиска состојба.
Според француските медиуми, вкупниот долг на клубот од предградието на Лил изнесува околу 180.000 евра, вклучувајќи и заостанати плати. Иако Лом веќе неколку сезони се соочуваше со финансиски предизвици, досега успеваше да ги амортизира без сериозни последици. Но, овојпат Националната комисија за контрола и управување при Ракометната федерација на Франција донесе строга одлука – директно исфрлање.
Лом не е единствен случај. Само пред еден месец, истата судбина ја доживеа и Мерињак, кој заврши на деветтата позиција во Супер женската лига. Пред две години, на овој клуб му беа одземени пет бодови поради финансиски неправилности, а минатата сезона правно успеа да остане во елитата благодарение на тоа што Сел Сир Бел беше префрлен во Втората лига.
Сепак, и Сел Сир Бел неодамна се најде на удар – и покрај вложената жалба, федерацијата ја отфрли, па клубот исто така ќе се натпреварува во трета лига.
Уште три клуба се под истрага и би можеле да бидат исфрлени во Втората лига.
