Исландската ракометна легенда Александер Петерсон официјално се повлече од активното играње, само неколку дена пред да го прослави својот 45-ти роденден. Неговиот последен клуб, Валур од Рејкјавик, му приреди заслужено збогување и признание за неговиот придонес кон спортот.
Петерсон, роден во Рига (Летонија), зад себе остава речиси три децении успешна кариера, во која одигра 186 натпревари за исландската репрезентација и постигна 725 голови. Меѓу врвните моменти се среброто на Олимписките игри во Пекинг 2008 и бронзата на Европското првенство 2010 во Австрија. Во 2010 година беше прогласен за Спортист на годината во Исланд.
Во клупската кариера, Петерсон остави длабок белег во Бундес лигата, каде одигра 522 натпревари и постигна 1.757 голови. Во Германија настапуваше за неколку водечки клубови – Фленсбург, Фуксе Берлин, Рајн Некар Левен и Мелзунген, Диселдорф, Гросвалштат. Неговиот дрес со кој настапуваше во Манхајм сега виси под покривот на „САП Арена“, како симбол на неговиот придонес во клубот.
„Ракометот ми го спаси животот,“ искрено изјави Петерсон, кој на 13 години се оддалечи од животот на улица и започна спортска приказна која ќе инспирира генерации. „Ако не беше ракометот, можеби ќе завршев на лош пат. Спортот ми даде насока и цел.“
По пет години во исландскиот клуб Грота, замина во Германија, каде што стекна државјанство и изгради блескава кариера. Во своите рани денови на Исланд, покрај ракометот, работел и физички работи за да се издржува – искуство што, како што вели, го изградило како личност.
Во својата кариера, Петерсон освои бројни трофеи: две титули во Бундеслигата (2016, 2017), три трофеи во Супер Купот, еден трофеј во Куп, и два европски трофеи – ЕХФ Купот во 2013 и ЕХФ Европскиот Куп во 2024. Настапуваше и во Катар за Ал Араби како позајмен играч во 2023 година.
Со пензионирањето на Александер Петерсон, ракометот губи не само извонреден бек и стрелец, туку и вистински борец кој на теренот секогаш го даваше максимумот. Неговата приказна останува инспирација за младите спортски надежи – доказ дека со посветеност и дисциплина, секој може да ја промени својата судбина.
