Екипата на Охрид во последното коло за оваа година пред својата публика славеше над Струга со 42:25 запишувајќи ја 12-та сезонска победа и со новите два бода се позиционираше зад водечката тројка на табелата, односно на 4. позиција со 25 бода.
Ракометарите на Охрид уште од самиот старт наметнаа свое темпо кое гостите од Струга не можеа да го следат. Избраниците на Стевче Алушовски во воведниот дел имаа 5:2, овие ,,плус три” ги имаа до 10-та минута, потоа започнаа да ја зголемуваат предноста.
Охрид кон средината на првиот дел дојде до 11:6, а гостите тешко ја пробиваа одбраната на „гладијаторите“. Струга за момент ја подобри играта, намали на 12:8, но до крајот на полувремето домаќините одиграа според посакуваното и на пауза заминаа со предност од плус шест, 20:14.
Домашниот тим на стартот на вториот дел со четири гола во низа дојде до двоцифрена предност од 24:14 и веќе тука беше јасно дека бодовите ќе останат дома. Струга првиот гол во второто полувреме го постигна во 37-та минута преку кружниот напаѓач Филип Пајкоски. До финишот Охрид само ја зголемуваше предноста и речиси секоја грешка на ривалот ја казнуваше со гол за конечни 17 гола разлика.
Најефикасни во победничката екипа беа Наум Костов и Дејан Кукуловски, двајцата ракометари имаа по шест гола, а кај гостите листата на стрелци ја предводеше средниот бек Бобан Савески со пет реализации.
