Македонскиот шампион Еурофарм Пелистер забележа нова победа во домашното првенство, откако во Битола го совлада Тиквеш без особени проблеми со 40-23. Клучната залиха за битолчани беше обезбедна во финишот на првиот дел, кога беше плус пет, во вториот дел голманот Ивиќ имаше серија интервенции, Алонсо им даде шанса на повеќето ракометари од клупата, но на крајот шампионот славеше убедлив триумф.

Новиот стратег Раул Алонсо по дебито во ЛШ, го водеше за првпат тимот и во Супер лигата и може да биде задоволен од изданието на неговите избраници. Кавадарчани беа на овој меч без првиот стратег Кристијан Грчевски, па тимот го водеше Боро Ѓорѓиев, а се уште во фаза на рехабилитација се Симиќ и Шулески.

За составот на битолчани не беа во комбинација Печурица, Манасков, Петровиќ и Цикатиќ, додека Костески се уште не е подготвен за камбек на теренот.

Кавадарчани отворија со водство 3-1, но потоа домаќините ја преземаа контролата на теренот. Имаа плус два, 5-3, па 6-4, а гостите преку Мијатовиќ и Кривокапиќ успеваше да одржува рамнотежа дваесетина минути.

Тогаш шампионот нагази, обезбеди добра залиха од пет погодоци, 18-13, и веќе беше јасно каков тек ќе има овој натпревар. Капитенот Кузмановски не влегуваше на теренот во воторот полувреме, Алонсо изротира повеќе ракометари, но тоа не се почувствува на теренот и предноста се триплира.

Најдобри стрелци во победничкиот тим беа Богдан Радивојевиќ со седум и Петар Атанасијевиќ со шест гола, додека по пет пати во листата на стрелци се запишаа Павле Атанасијевиќ и Цветан Кузманоски. Во составот на Тиквеш, Игор Кривокапиќ даде седум погодоци.

Еурофарм Пелистер в четврток го очекува дуел од Лигата на шампионите против унгарскиот Веспрем, а потоа ќе игра на гости кај Струга, додека Тиквеш ќе се пресмета со Пролет на домашен терен следниот викенд.

Ракометарите на Вардар утре против Мелсунген ќе го одиграат последниот сезонски натпревар на европска сцена.

Бундеслигашот во Скопје ќе гостува во рамки од последното коло од групната фаза во Лигата на Европа и против „црвено-црните“ ќе настапи речиси во комплетен состав.

Иако Мелсунген веќе го обезбеди пласманот во главната фаза во второто по ранг европско клупско натпреварување, сепак, тренерот Роберто Гарсија Парондо нема да му олесни на својот поранешен клуб.

Ривалот на Вардар за разлика за утрешниот натпревар, во претходното 4. коло на гостувањето на Исланд кај Валур настапи без речиси цела постава, недостасуваа Небојша Симиќ, Давид Мандиќ, Тимо Кастенинг, Адријан Сипос, Даинис Кристопанс…

Парондо во Скопје нема да смета на два клучни играчи. Станива збор за Адам Моравски и Арон Месинг, првиот нема да игра поради здравствени причини, вториот заработи повреда во дуелот со Ајзенах и ќе биде надвор од терените неколку недели.

Утрешниот дуел меѓу Вардар и Мелсунген ќе се одигра со почеток од 20:45 часот во СЦ „Јане Сандански“.

Репрезентацијата на Шведска, која е еден од ривалите на Македонија на ЕП, убедливо ја совлада Полска на претпоследниот тест пред настапот на континенталниот собир.

Швеѓанките, кои претходно двапати славеа против Шпанија (40:24, 40:28), денеска ја торпедираа и Полска триумфирајќи со 38:22.

Токму Шведска е прв ривал на Македонија на Европското првенство, натпреварот против скандинавската репрезентација „црвено-жолтите“ ќе го одиграат на стартот, односно на 28 ноември.

Словачка на пријателски натпревар ја совлада Украина со 30:28 покажувајќи дека е во добра форма пред ЕП.

Во рамки од Златната лига, Норвешка ја победи Холандија со 33:21, додека Данска немаше проблеми против Романија, ја победи со десет гола разлика, 35:25.

Македонија со пораз патува на ЕП

Ракометарите на Овче Поле по победите против Кичево и Астраион, односно ремито со Јехона, ја продолжија серијата без пораз, откако славеа против Аеродром со 34-31.

Иако гостите од Скопје парираа одлично, повеќепати водеа и со три гола разлика, сепак во финишот на првиот дел домаќините успеа да се вратат во егал, 15-15.

Во ист стил стартуваше и вториот дел, Аеродром водеше со 19-18, а потоа со четири гола во серија Овче Поле направи пресврт, поведе со 22-19 и до крајот не ја испушти предноста.

Домашните во еден момент имаа и плус седум, 31-24 и само рутински ја довршија задачата. Најдобри стрелци во победничкиот тим беа Иван Димчевски со девет и Кристијан Стаменков со осум гола, додека кај Аеродром по седум гола имаа Андреј Ниновски и Александар Симоновски.

Вториот тим на „сино-белите“ од Автокоманда, кој минатата сезона играше во Супер лигата, запиша нова победа во прволигашката конкуренција, откако славеше против Јехона со 50-28.

Предводник на домашните беше Марко Каркалашев, кој постигна дури 14 погодоци, а Александар Стојков даде осум гола. Во составот на Јехона по девет реализации има Адис Салиу и Бојан Давидоски.

Овче Поле сега има десет бода што е доволно за третото место, додека Јехона останува петта со седум, но и тоа може да биде доволно за место во плеј-офот. Тимот од Автокоманда е втор со 13, а Аеродром е шести само со три бода.

Женската репрезентација на Македонија се подготвува за настапот на Европското првенство во Унгарија, Австрија и Швајцарија, но јавноста можеби ќе биде ускратена за можноста да ги следи натпревари со македонски коментар.

Според информациите објавени на сајтот на Европската ракометната федерација, многу ТВ куќи од регионот, Европа и светот до денеска ги откупиле правата за преноси на натпреварите од континенталниот собир, но меѓу нив не е ниту националниот сервис МТВ, ниту некоја од другите ТВ куќи од Македонија што во минатото вршеле преноси од ракометните настани.

Регионалниот спортски ТВ канал Арена Спорт, ги има правата за преноси на ЕП во Србија, Македонија, Босна и Херцеговина, Косово, Албанија и Словенија. Во Србија покрај Арена Спорт, натпреварите на домашната репрезентација ќе пренесува и националниот сервис РТС, исто како и во Словенија, РТВ Словенија. Во Хрватска, натпреварите од ЕП ќе се гледаат на РТЛ, додека во Црна Гора на РТЦС.

Информациите од македонскиот национален сервис се дека преговорите со примарниот носител на ТВ правата, се уште траат и неизвесно е дали натпреварите од континенталниот собир ќе бидат пренесувани на МТВ, а доколку договор биде постигнат, тоа ќе биде во последен момент.

Македонија со Шведска игра на стартот на ЕП, на 28 ноември од 20:30 часот, а потоа ќе следуваат средбите со Турција и Унгарија.