Тимот на Младост Богданци ја продолжи серијата без пораз во прволигашката конкуренција и триумфираше на гости кај Шампион со 38-26.
Домашните парираа до средината на првиот дел, кога Младост имаше само гол предност, 9-8.
Потоа Шампион почна да греши, гостите од Богданци ги казнуваа сите грешки со лесни погодоци и веќе беше 15-8, а до паузата победата беше најавена, 19-12.
Во второто полувреме домашните немаа сили за камбек во натпреварот, а богданчани рутински го приведоа мечот до крај.
Најдобри поединци во победничкиот состав беа Антонио Николоски со осум и Душан Каркалашев со седум гола, а кај Шампион се истакна Бобан Дебрешлиоски со шест погодоци.
Во следното коло Младост Богданци игра дома со Јехона, а Шампион ќе гостува во Велес кај Борец.
