За оние што не ги следат толку случувањата со националниот тим на Македонија, беше изненадување отсуството на крилата Дејан Манасков и Гоце Георгиевски од поширокиот список пред двомечот со Португалија од квалификациите за ЕП 2024.
Но за оние што се малку повеќе инволвирани во настаните, и оние што беа присутни во Краков, а особено во Плоцк на Мундијалот, ова беше очекувано.
Селекторот Кире Лазаров вели дека против Португалија ќе им даде шанса на помладите леви крила, Кузманоски и Атанасијевиќ, но дека Манасков би можел да се врати во националниот тим.
„После СП решив да им дадам шанса на помладите играчи, од типот на Цветан Кузманоски кој што е голем талент и покажа дека може да се натпреварува на ова ниво и Петар Атанасијевиќ, кој на СП на последните мечеви покажа дека располага со огромен потнцијал на кој што во иднина треба да се смета. Значи и со овој ростер имаме квалитет. Се надевам дека ќе бидеме компетитивни и да се избориме за позитивен резултатот. За Манасков, вратата е отворена. За оваа репрезентација, за национална селекција треба да сакаш да играш. За никого не е затворена вратата, одлуката не е конечна“, вели Лазаров.
Македонија и Португалија првиот натпревар ќе го одиграат во Скопје на 9 март, додека реваншот е во Матосињос на 12 март. Двете селекции практично се веќе пласирани на ЕП, а сега ќе се борат за првото место во групата.
ПОВРЗАНИ ВЕСТИ
