Иранецот Алиреза Мусави веќе петта година живее во Романија и настапува за екипата на Динамо Букурешт. Тој во 2015 година пристигна со браќата Естеки, Алахкарам и Сајед во Букурешт.
Во меѓувреме тие си заминаа, а Мусави и голманот Саед Хајдарирад играат голема улога во успесите на Динамо кој четири пати по ред стана шампион на Романија. Алиреза Мусави сака да стане Романец и веќе доставил документи за да добие државјанство.
„Сакам да станам Романец, ја сакам Романија. Ги добив сите потребни документи од Иран и поднесов. Сакам што побрзо да добијам државјанство. Ми се допаѓаат луѓето, местата, црквите, зградите, парковите. Навистина има многу специјални работи во Букурешт. Навистина се чувствувам како дома на теренот, во салата на Динамо заедно со навивачите. Тоа е за мене „дома“, можам да зборувам и да разбирам романски, а Романците се многу пријателски расположени“, рече Мусави за романската „Либертатеа“.
Мусави со добивањето на романско државјанство ќе има право на настап за репрезентацијата на Романија и ќе биде големо засилување. Тој има 30 години, висок е 1,95м и негова специјалност е играта во одбрана.
ПОВРЗАНИ ВЕСТИ
