Блажески фантастичен на голот, Бутел го освои Кавадарци

Екипата на Бутел предводена од голманот Бојан Блажески со 15 интервенции славеше на гостувањето во Кавадарци кај Тиквеш, со резултат, 27:28, во натпревар од 8. коло од плеј-оф фазата во Суперлигата.

Блажески беше херојот на Бутелци бидејќи не дозволи поделба на бодовите од овој натпревар, го одбрани зицерот на Лазов во последната секунда, а пред тоа, исто така беше поуспешен во дуелот со Дрогришки.

Ракометарите на Тиквеш во поголемиот дел од првото полувреме беа во минимална предност од еден до два гола разлика и најчесто кога требаше да дојдат до три позитива грешеа во нападот. Во неколку наврати водството на Тиквеш беше плус два, но гостите од Бутел не дозволуваа домаќинот да се одлепи на поголема разлика и секогаш наоѓаа начин да дојдат до израмнување на резултатот.

Така беше до 25 минута кога резултатот беше нерешен, 11:11. Тиквеш со серија од 3:0, која беше дело на Лазов, Симиќ и Гошевски, за првпат на натпреварот поведе со плус три, 14:11. Иако, се очекуваше домашниот состав да го задржи водството, сепак, гостите со два брзи гола за една минута успеаја да се изборат за минус еден на полувреме, 14:13.

Тиквеш од почетокот на второто полувреме, па сѐ до 45 минута ја диктираше играта на терен. По водството од 21:19, гостите со погодоците на Младеновски и Мајиќ го израмнија резултатот, 21:21. Во последните петнаесетина минути беше јасно дека само нијанси ќе решават за денешниот исход во СЦ „Јасмин“.

Падот во играта на Тиквеш беше искористен од страна на гостинот, кој направи пресврт и поведе со 23:24 на речиси десет минути пред крајот. Следуваше игра гол за гол и резултатска неизвесност. Домаќините имаа неколку шанси за израмнување на резултатот, од кои последните две беа на дваесетина секунди пред крајот, но голманот Бојан Блажески го одбрани зицерот на Дрогришки и Лазов и заслужено се радуваше со своите соиграчи на освоените бодови од Кавадарци.

Најефикасен во победничката екипа беше Мирко Мајиќ со осум погодоци. Во екипата на Тиквеш се истакнаа Страхиња Симиќ со осум и Стефан Трпчевски со четири погодоци.