Ракометарите на Вардар се израдуваа на првата победа сезонава во Лигата на шампионите откако денеска го совладаа Мешков Брест со 35:27. „Вардарци“ одиграа моќно и доминираа 60 минути. Имаа неколку мали падови во вториот дел, но ова е огромна победа која ја зголемува самодовербата.
Од почетокот на средбата се виде решителна игра од ракометарите на Вардар и концентрација која водеше кон триумф. Не беше едноставно да се игра против Мешков Брест кој има одлични поединци и покрај тоа што е некомплетен, но после водството од 1:0 и израмнувањето од гостите на 1:1 следуваше далеку подобра игра на Вардар.
Предноста во првото полувреме постојано растеше. Иако имаше малку голови во првите десет минути во продолжението од натпреварот работите тргнаа на подобро. Разликата почна да се зголемува. Вардар имаше главно плус четири гола, но гостите надоместуваа и се враќаа на два гола.
И покрај тоа што гостите се држеа следуваше период во кој Вардар заигра одново на високо ниво, а головите паѓаа од сите можни позиции што резултираше со водство од шест гола за на одмор да се замине со 19:13.
Второто полувреме ја донесе првата поголема криза во играта на Вардар. Откако за четири минути игра Вардар стигна до 22:15 дојде до пад во ритамот. Многу лесно беа примени неколку погодоци, а тоа допринесе тимот на Мешков Брест да се врати во игра и да намали. Во 40. минута Вардар имаше само 22:19 што го вклучи алармот.
Сепак, немаше простор за паника бидејќи ритамот беше зачуван, но се бараше играта со која ќе се дојде до враќање на сигурната предност. Таа дојде после 26:23 во 46. минута. Кевин Њокас тргна со сите сили за да докаже дека Вардар не направи грешка кога го ангажираше и се откажа од Едуардо Гурбиндо. Распали кон голот на Мацкевич и едноставно го полнеше голот на Мешков Брест.
Таквата игра беше искористена и од другите, па на пет минути до крајот стана јасно дека Мешков Брест денеска нема никакви шанси. До крајот беше одработено одлично и сигурно за конечни 35:27 и прва победа за Вардар во оваа сезона во Лигата на шампионите.
ЛИГА НА ШАМПИОНИ – ГРУПА А
ТАБЕЛА