Ракометарите на Струга по поразот во Скопје од Пролет, ја запишаа првата победа во плеј-аутот од Супер лигата, откако славеа против Куманово со 26-24. Иако домашните водеа со плус пет во финишот, дозволија камбек на кумановци, кои го направија финишот интересен. Сепак не го реализираа нападот за реми, па точка на победата на Струга стави Мијушковиќ со голот во последната секунда.
Двете екипи одиграа израмнет прв дел во кој најчесто се играше гол за гол. Струга еднаш водеше со плус два, исто таков беше случајот и со Куманово, а на пауза гостите заминаа со предност, 15-14.
Остиќ врза неколку интервенции, па Струга поведе со 19-17, напаѓаше и за плус три, но не успеа, па гостите се вратија во егал, откако и Михајловски одбрани на спортивната страна.
Кумановци не искористија напад за водство, па казната стигна и Струга одново беше на плус два, па стратегот Димковски мораше да бара тајм-аут. Но и покрај тоа на неговите момци им снема идеја во нападот.
Стружани знаеја како да го искористат тоа и на десетина минути до крајот се одлепија на плус пет, 24-19. Голманот Трајковски му обрани пенал на Стојков, тоа им даде ветар во грб и Куманово успеа да ја стопи негативата, 25-23.
На пет минути до крајот, гостите напаѓаа и за минус еден, нападот не беше искористен, но и стружани погрешија и мечот со голот на Димевски за 25-24 отиде во неизвесен финиш. Домаќините пак не упатија удар кон голот на Трајковски и на четириесетина секунди до крајот Куманово тргна во напад за реми. Немаше шут и Струга преку Мијушковиќ го запечати триумфот.
Најдобри стрелци во победничкиот тим беа Ристиќ со осум и Мијушковиќ со пет погодоци, додека по пет пати во гостинскиот тим реализираа Димевски и Цветковски. Во следното коло Струга оди кај Радовиш, а Куманово ќе го пречека Прилеп.
