Македонскиот шампион Еурофарм Пелистер по поразот од Вардар во вечното дерби им се врати на победите во Супер лигата и славеше на домашен терен против составот на Пролет со 30-21.
Домаќините уште на стартот поведоа со 3-0, па беше 5-1 и 9-2, и јасно беше кој ќе слави на овој дуел по десетина минути. Кузманоски и Кузмановски беа расположени за игра и тие најчесто погодуваа за домашниот тим, а тренерот Ангеловски потоа во игра ги внесе и Ѓорговски, Павле Атанасијевиќ, Петровиќ…
Јовиќ побара минута одмор уште во 10. минута, неговите играчи заиграа подобро, но не успеаја да ја намалат високата негатива. Напротив, таа растеше до плус 11, откако во последната секунда од првиот дел погоди Цехте за 20-9, резултат со кој се замина на пауза.
Вториот дел беше само формалност на овој натпревар и публиката во „Боро Чурлевски“ немаше можност да види возбудувања, иако Пролет успеваше неколку пати да погодува во серија.
Капитенот Филип Кузмановски доби директен црвен картон по стартот над Томислав Димковски на три минути до крајот, потоа третпат беше исклучен и Павле Петровиќ, па и тој мораше на трибини, но тоа немаше никакво влијание на конечниот резултат.
Најдобри стрелци во победничкиот тим беа Цветан Кузманоски со шест и Филип Кузмановски со пет погодоци, додека кај Пролет се истакнаа Томислав Димковски со шест, односно Мице Шилегов со пет голови.
Следен предизвик за шампионот Еурофарм Пелистер ќе биде гостувањето кај Куманово в сабота, додека Пролет в петок ќе игра против составот на Вардар.
