Новиот суперлигаш Бисинов ФЛ запиша втор триумф во суперлигашкото друштво, откако славеше на домашен терен против составот на Струга со 37-30. Ова е втора победа за велешани во меѓусебните дуели со овој ривал, откако славеа и на премиерниот меч од сезонава на гостински терен, а сега првпат се радуваат и на домашен терен во елитната конкуренција.
Најзаслужни за триумфот на велешани беа бековите Ивица Илиев и Тоше Ончев кои комбинираа 20 гола. Момците на Владимир Глигоров најавија победа уште во првото полувреме, поведоа со 5-1 на стартот, па беше и 10-5, па 14-7.
Стружани тогаш за момент се вратија во мечот. Тутенкоски одбрани неколку шута, погодуваа Пајкоски, Ѓорѓиески и Костоски и гостинските ракометари успеаја да намалат на минус три, 16-13. На паузата велешани водеа со четири гола, 19-15.
Избраниците на Наум Танески во вториот дел уште еднаш намалија пак на минус три, 21-18, но тогаш искусниот Паунов влезе во серија, велешани погодија два пати со играч помалку се одлепија на 25-19, но гостите не се откажување од бркање на негативата.
Повторно беше редот на Струга, погодија крилата Ѓорѓиески и Костоски на пет минути до крајот за 31-27, но Мијушковиќ згреши и Бисинов ФЛ тргна во напад за потврда на победата. Крилото Димов постигна клучни голови за домашните во финишот и не дозволи гостите да се понадеваат на камбек. Во финишот по трите исклучувања, црвени картони заработија Сиљанов кај домашните и Мијушковиќ кај гостите.
Најдобри стрелци во победничкиот тим покрај Илиев и Ончев, кои дадоа 13, односно седум гола, беа Димов и Трајковски со по шест реализации, додека кај Струга, Костоски имаше осум погодоци, а Пајкоски додаде уште шест. Во следното коло, Бисинов ќе го пречека Вардар во Велес, додека стружани дома ќе играат против шампионот Еурофарм Пелистер.
