Еурофарм Пелистер во Малик Татар доби големо засилување за новата сезона. Најдобриот стрелец во словенечкото првенство со нетрпение го очекува дебито пред битолската публика и првите настапи во дресот на македонскиот вицепрвак.
Словенечкиот бек е презадоволен од првите денови во новата средина и истакнува дека добро знае што претставува ракометот за Битола и колку големи се очекувањата од играчите на Еурофарм Пелистер.
„Атмосферата е супер, соиграчите, сите имаме иста цел. Знаеме дека во Битола се живее за ракометот и затоа ние треба да живееме за нив. Како што Червар кажува, логично, така и јас не сакам да губам. Сакам да се борам и да дадам сè од себе. Тука во Битола, тоа што ќе им го дадеш на навивачите, тоа и ќе ти го вратат. Од година во година македонската лига е сè посилна и сè повеќе се вложува во ракометот. Ќе биде тешко, но мислам дека можеме да ги оствариме нашите цели“, изјави Татар.
Пелистерци веќе ги одработуваат подготовките за новата сезона, а главниот дел од нив ќе го реализираат во Словенија, каде што ќе одиграат и три контролни натпревари.
Потоа следуваат три средби од Регионалната лига против Партизан, Дубочица Лесковац и Ловќен, пред стартот на Супер лигата и дерби гостувањето кај Охрид.
