Само нешто повеќе од еден месец пред почетокот на новата сезона, Српската АРКУС лигата се соочува со сериозен проблем. Врање е пред откажување од најсилното српско натпреварување поради финансиски проблеми, а сите ракометари од составот добиле дозвола да побараат нови клубови.
Српскиот ракомет е пред нов голем удар. Врање најверојатно нема да настапува во АРКУС лигата во сезоната 2026/27, откако раководството ги известило играчите дека градот повеќе нема да го финансира клубот.
Официјалното повлекување сè уште не е објавено, но според информациите на „Моцарт Спорт“, управата во следните денови треба да ја потврди одлуката. Новата сезона треба да започне во втората недела од септември, а Врање веќе беше дел од ждрепката и го доби распоредот за новото првенство.
Во текот на летото од Врање веќе заминаа голем број ракометари, а сега слободни се и последните играчи кои имаа важечки договори за следната сезона. Меѓу нив се голманот Алекса Богуновиќ и левиот бек Војин Мишиќ, кои требаше да останат дел од тимот предводен од тренерот Саша Бошковиќ.
Претходно клубот го напушти најдобриот стрелец во АРКУС лигата, Његош Ѓукиќ, кој потпиша за словачкиот шампион Татран Прешов. Капитенот Стефан Павловиќ се пресели во Дубочица, Милан Дакиќ замина во Будва, Урош Симиќ во Црвена звезда, а искусниот Марко Васиќ во Југовиќ.
Случувањата во Врање потсетуваат на судбината на некогашниот европски вицешампион Пролетер од Зрењанин, кој минатата сезона се повлече од АРКУС лигата во текот на натпреварувањето поради финансиски проблеми.
Сега уште еден клуб е пред откажување, овојпат пред почетокот на сезоната. Тоа дополнително ја отвора темата за финансиската стабилност на српското првенство, особено во период кога се формира нова регионална лига и посилна конкуренција за клубовите од регионот.
По најавеното повлекување на Врање, раководството на АРКУС лигата и Ракометната федерација на Србија ќе мора брзо да пронајдат решение. Новото првенство беше планирано со 12 клуба, па сега останува да биде одлучено дали местото на Врање ќе го добие друга екипа или лигата ќе започне со помал број учесници.
_________________________________________________________________________________________
▶▶▶ Добивај директно РАКОМЕТНИ ВЕСТИ вести на твојот мобилен телефон, приклучи се на Viber групата на семејството на 24Ракомет. Со еден клик до сите вести.
_____________________________________________________________________________________________________
