По триумфот во Штип, Металург Автокоманда продолжи со победите и на домашен терен славеше против Вардар со убедливи 30-19. Гостинките парираа во првите петнаесетина минути во Автокоманда и одржуваа рамнотежа, но на пауза Металург Автокоманда водеше со 13-10.
На стартот на вториот дел домаќинките останаа без Марија Јанкуловска, која доби црвен картон по ударот во глава кон голманката Вероника Ѓорѓиевска. Вардарки имаа добри моменти, тогаш и намалија на минус два, 15-13, но следуваше голем пад, неколку нереализирани напади и домаќинките се одлепија на плус седум.
До крајот немаше дилеми околу победникот и само се зголемуваше гол-разликата во корист на избраничките на Дамчевска.
Најдобри стрелци во победничкиот тим беа Бојана Коцева со седум и Марија Гугуљанова со пет гола, додека кај Вардар се истакнаа Леона Миленковска со седум и Сара Богојеска со шест погодоци.
Во следното коло по репрезентативната пауза, Вардар ќе го пречека Ѓорче Петров, додека Металург Автокоманда ќе гостува кај Куманово.
