Минатата сезона, последниот шут на Гисли Кристјансон за победа од 28-27 на гостувањето кај Веспрем му донесе пласман на Магдебург на Ф4 во Лигата на шампионите. Оваа сезона, актуелниот шампион многу поубедливо ги отвори четвртфиналните натпревари, славејќи во Унгарија кај ПИК Сегед со 35-28.
ПИК Сегед немаше решение против ладнокрвниот Магдебург во натпреварот на неделата, што беше трета победа на германскиот тим над унгарскиот ривал оваа сезона, по двата триумфи во групната фаза.
Сегед беше ослабен без бековите Лазар Кукиќ и Ричард Бодо, додека Магдебург настапи со комплетен ростер. Во првите 15 минути гостите наметнаа брзо темпо и поведоа со 10-5, но Марио Шоштариќ со серија контранапади израмни на 11-11.
По паузата темпото дополнително се засили, но и грешките се зголемија, претежно кај Сегед, што Магдебург го искористи за прво значително водство од шест гола (26-20). Клучот за убедливата предност беше бековската тројка Феликс Клар, Кристјансон и Албин Лагергрен, кои заедно постигнаа 20 голови, како и голманот Сергеј Ернандез со 11 одбрани.
Победникот беше решен на четири минути до крајот при 33-27, а во завршницата Сегед двапати не реализираше седмерци против Матеј Мандиќ.
Сегед повторно се соочува со проблемите против германските тимови во нокаут-фазата. Од 2015 година наваму, унгарскиот клуб пет пати бил елиминиран од германски екипи, четири пати од Кил и еднаш од Фленсбург.
Минатата сезона беа најблиску до Келн, но беа елиминирани од Барселона со два гола разлика, и покрај победата на гости. Причина беше домашниот пораз во првиот натпревар.
Против Магдебург, Сегед очигледно страдаше од недостиг на клупска ширина. Додека германскиот тим ротираше без проблем, домашните ракометари мораа речиси цел натпревар да играат и во напад и во одбрана. По заминувањето на Јим Готфридсон и повредите на Кукиќ и Бодо, изборот на играчи беше премногу ограничен за да се спротивстават на Магдебург.
____________________________________________________________________________________________________
Добивај директно вести на твојот мобилен телефон, приклучи се на Viber групата на семејството на 24ракомет. Со еден клик до сите ракометни вести.
_____________________________________________________________________________________________________
