Ракометарите на Охрид во натпревар од првото коло од плеј-оф фазата славеа на гостувањето во Скопје кај Бутел со резултат 22:20. Иако Охрид во второто полувреме водеше со 19:11, избраниците на Кузманоски не се предадоа и до последната минута беа во игра барем за бод.
Бутел на стартот поведе со 2:1, но гостинскиот тим со головите на Цирар, Јотиќ и Ојлески дојде до 5:2 кон средината на првиот дел. Свои моменти меѓу стативите имаа двајцата голмани Бојан Блажески и Градимир Чаневски, а двете екипи имаа свои подеми и падови во текот на целиот натпревар.
При предност на Охридод 5:3, домаќиите не искористија ,,безброј ситуации”, па така гостите со два гола во низа зголемија на 7:3 во 18-та минута. Кризниот период во домашниот тим го прекина Димитар Узунчев, кој намали на 7:4, потоа истиот ракометр, но сега од контра, реализираше за минус два, 7:5.
Избраниците на Алушовски до крајот на првиот дел беа во резултатска предност и ги казнуваа дел од грешките на домаќинот. Откако Будел намали на 8:6, гостите одговорија со серија од 4:0 зголемувајќи на 12:6. На пауза резултатот гласеше 13:8 во корист за „гладијаторите“.
Охриѓани за десет минути игра во вториот дел дојдоа до 19:11 и веќе тука беше јасно дека домаќините ќе имаат тежок предизвик за кам-бек. Црвен картон во 36-та минута заработи членот на Бутел, кружниот напаѓач Драган Шолиќ. Гостите поради високата предност се опуштија и Бутел со пет гола во низа се закани намалувајќи на 19:16.
Составот на Алушовски во периодот од 43-та до 51 минута беше без реализација. Бутел по неколку пропуштени шанси за минус два, во 55-та минута конечно дојде до два гола негатива, 20:18. Иако Охрид имаше 21:18, домаќините не се предава, погодија Ѓеоргиевски и Димитар Узунчев за минус еден, 21:20. Остана уште една минута, во која Охрид со голот на Цирар од пенал ја обезбеди посакуваната победа.
Најефикасни во победничкиот табор беа Гал Цирар со седум и Гоце Ојлески со шест погодоци. Во поразениот табор први стрелци беа Димитар Ѓеоргиевски и Христијан Милошески со по четири погодоци.
