Викендов се комплетираа натпреварите од третото квалификациско коло во Лигата на Европа и познати се сите учесници во групната фаза.

По поразот и на вториот меч од Елче, со 32-28, хрватскиот вицепрвак Локомотива Загреб каде што игра македонската репрезентативка Андреа Седлоска ги заврши европските настапи. Седлоска беше најдобар стрелец на мечот со Елче и постигна пет гола, но тоа не беше доволно за нешто повеќе на овој натпревар.

Најинтересно беше на дуелот меѓу Кобержице и Ларвик, чиј регуларен дел заврши со победа на полскиот тим 39-38. Тоа значеше дека ќе има пенали, а некогашниот норвешки гигант, успеа со триумф од 5-4, да направи голем европски успех.

Германија ќе има дури четири претставници во групната фаза – Борусија Дортмунд, Турингер, Бломберг и Бенсхајм, три од Норвешка – Фредрикштад, Сола и Ларвик, потоа по две француски екипи – Дижон и Париз, две шпански – Бера Бера и Елче и две од Романија – Дунареа Браила и Валчеа.

По еден претставник ќе имаат Полска – Заглебје, Данска – Икаст и Унгарија – Мошонмаѓаровар.

Лига на Европа, 3 квалификациско коло, резултати:

Савехоф (Шведска) – Заглебје (Полска) 30-28, 23-27
Сола (Норвешка) – Брул (Швајцарија) 33-23, 37-32
Ларвик (Норвешка) – Кобержице (Полска) 30-29, 38-39, 5-4 пен.
Локомотива Загреб (Хрватска) – Елче (Шпанија) 21-28, 28-32
Дижон (Франција) – Зрињски (Хрватска) 43-12, 26-17
Борусија Дортмунд (Германија) – Бањик Мост (Чешка) 36-32, 37-23
Турингер (Германија) – Вац (Унгарија) 34-22, 34-29
Бломберг (Германија) – Мецинген (Германија) 30-21, 35-27
Валчеа (Романија) – Дебрецин (Унгарија) 33-31, 31-28
Хорс (Шведска) – Париз (Франција) 25-30, 23-33
Лублин (Полска) – Бера Бера (Шпанија) 23-19, 20-26

Драгана Петковска и Ангела Јанкуловска со нивните Салерно и Славија Прага имаа „македонски“ двобој, а понатаму во осминафиналето оди чешкиот тим, па Јанкуловска ќе биде единствената од интернационалките во следната рунда.

Елиминации имаше и за Сара Стефаноска (пет гола), која со Јагодина одигра само реми со грчкиот Јонијас, 23-23, додека Ивона Трпевска (еден гол), на два пати минимално на домашен терен загуби од исландскиот Хаукар.

Тимот на Чаир ќе продолжи да ја брани честа на Македонија во осминафиналето, откако со две победи го елиминираше португалскиот тим Колехио Де Гаиа.

Покрај Чаир, во осминафиналето ќе има три шпански екипи – Порињо, Ваљадолид, Малага, две од Исланд – Хаукар и Валур, две од Чешка – Славија Прага и Хазена Кинжварт, потоа две грчки – ПАОК и Јонијас, како и по еден тим од Португалија – Мадеира, од Полска – Гњиезно, од Словачка – Јувента Михаловце, од Холандија – Унирек, од Украина – Галичанка, како и од Австрија – Ацгерсдорф.

Европски Куп, 3 коло, резултати:

Порињо (Шпанија) – Бурса (Турција) 34-26, 24-26
Ускудар (Турција) – Мадеира (Португалија) 25-28, 20-36
Гњезно (Полска) – Ериче (Италија) 30-18, 26-26
Валур (Исланд) – Кристијанштад (Шведска) 27-24, 29-24
Малага (Шпанија) – Сао Педро Сул (Португалија) 32-15, 24-23
Јувента Михаловце (Словачка) – Груде (Босна и Херцеговина) 44-20, 39-22
Јонијас (Грција) – Јагодина (Србија) 27-20, 23-23
Дуделанж (Луксембург) – Унирек (Холандија) 22-30, 31-36
Железничар Инџија (Србија) – Ваљадолид (Шпанија) 20-32, 21-23
Истогу (Косово) – Кинжварт (Чешка) 30-44, 32-34
Салерно (Италија) – Славија Прага (Чешка) 20-32, 32-29
Х71 (Фарски Острови) – ПАОК Солун (Грција) 23-31, 22-30
Галичанка (Украина) – Гарабах (Азербејџан) 33-20, 34-19
Колехио Де Гаиа (Португалија) – Чаир (Македонија) 25-29, 26-28
Гореле (Турција) – Ацгерсдорф (Австрија) 32-35, 26-35
Далматинка (Хрватска) – Хаукар (Исланд) 23-24, 16-17

Македонскиот шампион Еурофарм Пелистер ремизираше против Фредериција, 29:29, во натпревар од 8. коло од Лигата на шампионите. Избраниците на Алонсо имаа напад за два бода, но гостите се одбранија во финишот од средбата. На првото соочување меѓу двете екипи, победи Еурофарм Пелистер со 25:23.

По нерешените 4:4, тимот од Данска со два гола во низа за првпат успеа да се одлепи на ,,плус два” 6:4. До средината на првото полувреме голманот Никола Митревски беше без интервенција, додека на спротивната страна Торстен имаше две.

Фредериција некако успеаваше да ја сочува предноста, иако ниту тимот од Данска не играше најидеално, по 15 минути успеа да зголеми до дотогаш највисоките плус три, 10:7. Откако Митревски не можеше ништо да одбрани, тренерот Алонсо одлучи да направи замена, па во игра влезе вториот голман Филип Ивиќ, кој имаше само една интервенција за петнаесетина минути.

Во последните десет минути од првото полувреме пелистерци никако не можеа да дојдат до израмнување, не ги искористуваа грешките на ривалот, па така Фредериција константно беше во предност, но без голема комоција во играта, водеше со два до четири гола разлика. Гостите ја сочуваа стекнатата предност и на пауза заминаа со 16:13.

Откако Фредериција поведе со 17:13 на стартот на вториот дел, домаќините направија мини серија и намалија на 17:15 во 35 минута. За камбек во натпреварот недостасуваа одбраните на голманот. Ракометарите на македонскиот шампион намалија на 20:19 во 40 минута, а предноста на Фредериција во 45 минута остана иста, 21:20.

Домаќинот имаше шанса за израмнување, но искусниот Манасков погреши, па така гостите казнија за 22:20. Следуваа погодоците на Пешевски и Радивојевиќ за 22:22 во 47 минута и од тој момент Еурофарм Пелистер влезе во игра за победа. До крајот секој напад беше важен, а пелистерци, по нерешените 23:23, со голот на Кузмановски за првпат поведоа, 24:23, но гостите веднаш возвратија за 24:24.

Во последните десет минути се влезе со нерешен резултат, 25:25, се играше гол за гол, пелистерци наместо на два разлика, дозволија ривалот да израмни, 27:27, а на три минути пред финишот Фредериција со два гола во низа го презеде водството, поведе со 29:28. Еурофарм Пелистер израмни на 29:29, гостите не реализираа напад, но ниту домашниот тим не успеа да дојде до гол во последните секунди, па нерешениот резултат е најреален исход од денешната средба.

Еурофарм Пелистер во следното, 9. коло од европската елита ќе гостува кај унгарскиот гигант Веспрем.

Женската репрезентација на Македонија го одработува последниот тренинг пред заминувањето за Хрватска на „Кроација Куп“.

На Европското првенство во Унгарија, Австрија и Швајцарија, Македонија е во група со фаворитите Унгарија и Шведска, како и со Турција.

Од Ракометната федерација на Македонија ветија премија од 1.500.000 денари за секоја победа на континенталниот собир.

Нашите ракометарки ЕП го започнуваат на 28 ноември со дуел против Шведска, на 30 ноември одат на мегдан на Турција, додека на 2 декември е пресметката со Унгарија.

Претходно в сабота и недела, Македонија ќе одигра две пријателски средби против селекциите на Хрватска и Србија.

Шпанскиот стручњак Раул Алонсо денес официјално беше претставен пред јавноста како нов тренер на Еурофарм Пелистер.

45-годишникот од Мадрид потпиша договор на една и пол година и веќе го одработи првиот тренинг со македонскиот првак.

Новиот тренер на пелистерци на официјалното претставување ги сподели своите импресии.

,,Многу сум среќен и возбуден што сум тука. Имав топло добредојде од сите и ми покажаа дека им е драго што сум тука. Едвај чекам да работам со тимот. Заедно одработивме еден тренинг, на почеток сме на проектот. Среќен сум што сум дел од градот и клубот. Од она што го видов имам многу импресии поврзани со тимот. Има простор за голем напредок и можност екипата да биде во корелација со емоциите од трибините, од овој ракометно историски град”, изјави Алонсо.

Тој испрати порака до симпатизерите на Еурофарм Пелистет и го цитираше Јирген Клоп.

,,Знам дека нашата сала и нашите навивачи се посебни. Ова е ново животно искуство за мене, тимот има потенцијал, но мора и многу да работи. Сакам да им порачам на фановите дека сум среќен што ви се приклучив. Доаѓам на место кое бара многу од еден тренер, но може да кажам само што рече Јирген Клоп: Да создадеме култура во која сомнежите ќе ги претвориме во луѓе кои веруваат. Ние веруваме, мора да веруваме, секојдневно да работиме за да ги задоволиме нашите навивачи. Но, и порачуваме дека и тие ни се потребни, бидејќи со нив имаме еден, дури и два играчи повеќе”, рече Алонсо.

Дебито на Раул Алонсо е предвидено за в среда од 20:45 часот на дуелот со Фредериција во Лигата на шампионите.

📷 Еурофарм Пелистер го промовираше Раул Алонсо

Натпреварот меѓу Еурофарм Пелистер и Фредериција заврши реми, 29-29, иако и двете екипи имаа шанси да постигнат победнички погодок.

Тренерот на данскиот тим Гудмундур Гудмундсон, генерално е задоволен од изданието на неговите избраници.

„Беше многу тежок меч, како што очекувавме. Среќен сум поради нашата игра, игравме добро во првиот дел, бевме уште подобри на стартот на вториот дел, имавме ширина и генерално сум задоволен од изданието. Ние сме нов тим во Лигата на шампионите, освоивме бод, ќе бидеме уште подобри во иднина“, вели Гудмундсон.

Беккот Мадс Андерсен вели дека тој и неговите соиграчи правеле грешки во клучни моменти.

„Беше тежок натпревар со многу емоции, се обидовме да го дадеме најдоброто од себе, можеби направивме некои грешки во клучни моменти, губевме два разлика, направивме пресврт, имавме шанса за победа, но на крајот задоволни сме од освоениот бод.

Екс пелистерецот Реине Табода вели дека мора да бидат задоволни со освоениот бод.

,,Атмосферата беше прекрасна, многу добра атмосфера, мораме да биде задоволни со еден поен, на крајот успеавме да одиграме нерешени, така што мора да бидеме задоволни со еден поен”.

Следен предизвик за Фредериција ќе биде гостувањето кај полскиот првак Висла Плоцк.