Романскиот ракометен шампион, Динамо Букурешт, во следната сезона ќе биде предводен од актуелниот селектор на Португалија, Пауло Переира.
Тој моментално ја извршува тренерската функција во словенечкиот шампион Целје, клуб во кој пристигна минатото лето.
Переира ќе ја преземе клупата на Динамо Букурешт од поранешниот тренер на Вардар, Давид Дејвис, кој заминува поради незадоволство на управата на клубот.
За Переира, Романија не е непознаница, бидејќи во периодот од 2017 до 2019 го предводеше ЧСМ Букурешт.
Со тимот постигна забележителни резултати во домашниот шампионат и на европската сцена, освојувајќи го трофејот во Европскиот куп во сезоната 2018/19.
„Преговорите се во напредна фаза. Можам да кажам дека Переира 99% ќе биде тренер на нашиот тим следната сезона. Баравме квалитетен тренер запознаен со романската реалност“, изјави директорот на Динамо Букурешт, Јонут Попа, за спортскиот портал „Orangesport“.
Динамо Букурешт, кој беше еден од ривалите на Еурофарм Пелистер во групната фаза од Лигата на шампионите, беше елиминиран во осминафиналето од Магдебург.
Засега, нема официјални информации за идниот ангажман на Давид Дејвис.
Дејвис: Јасно и гласно ми кажаа – нема да го водиш Динамо догодина
