Екипата на Охрид во второто коло од плеј-офот ќе биде домаќин на актуелниот шампион Еурофарм Пелистер. Охриѓани настапот во разигрувањето за титулата го стартуваа со победа против Бутел.
Избраниците на Стевче Алушовски сега ќе имаат потежок предизвик, но неколку пати досега покажаа дека со помош на навивачите можат да бидат закана за сите.
Во регуларниот дел од Супер лигата, Охрид двапати беше поразен од битолчани, а двата порази беа тесни — 25:22 во Битола и 25:27 пред својата публика.
Искусниот голман на Охрид, Градимир Чаневски, ги сподели своите очекувања за неделниот натпревар со шампионот.
„Многу работи треба да се поклопат на неделниот натпревар, играме со актуелниот шампион. Добро е што започнавме со победа, имавме тешко гостување кај Бутел, и победата добро ќе дојде за екипата за да фатиме некој ритам. Ќе биде добар натпревар со Еурофарм Пелистер, празник за ракометот во Охрид, се надевам на добра атмосфера и полна сала. Важно е и одбраната да биде на ниво. Ние сме тим, секој зависен од секого, важна е и одбраната, голманите, нападот добро да функционира… за да имаме добар резултат,“ изјави Чаневски.
Натпреварот в недела ќе биде вистински празник за ракометот во Охрид, а сите очи ќе бидат вперени во оваа пресметка, која ветува многу возбуда.
Третата пресметка меѓу Охрид и Еурофарм Пелистер е закажана за 18:00 часот во СРЦ „Билјанини извори“.
