🎥 Родители се степаа на младински ракометен меч – едниот заврши во полиција!

Наместо ракометот и младите ракометарки да бидат во центарот на вниманието, натпреварот од романскиот шампионат за девојчиња до 15 години меѓу Банатул Темишвар и Милениум Џармата заврши во сенка на сериозен инцидент на трибините.

Двајца родители влегоа во физичка пресметка во салата „Константин Жуде“ во Темишвар. На снимката која брзо се прошири на социјалните мрежи се гледа како двајцата мажи се туркаат и удираат, а потоа паѓаат преку неколку редови седишта. Други присутни се обидуваат да ги разделат.

Највознемирувачкиот дел од снимката се реакциите на младите ракометарки. Девојчињата од теренот со неверување го следат она што се случува, се слушаат повици и вресоци, а една од нив се обидува со гестикулации да ги смири луѓето на трибините.

Според романските медиуми, конфликтот избувнал по незадоволство од судиските одлуки. Полицијата подоцна соопшти дека утврдува што точно го предизвикало инцидентот и го опиша како спонтан конфликт меѓу двајцата мажи.

Натпреварот, кој заврши со победа на Милениум Џармата со 28-18, бил исклучително тензичен и на самиот терен. Судиите доделиле вкупно 20 исклучувања од по две минути – 12 за домашниот состав и осум за гостинскиот тим. Тренерот на Банатул, Атила Хорват, бил дисквалификуван.

Сепак, сето тоа остана во втор план по сцените на трибините. Романката Адријана Белдиман, која ја објави снимката, јавно постави прашање каков пример возрасните им даваат на децата кога на младински натпревар доаѓа до физичка пресметка меѓу родители. Таа порача дека ракометот треба да значи почит, дисциплина и фер-плеј, а не насилство.

Полицијата во Темишвар реагираше по објавувањето на снимката и ги идентификуваше двајцата главни учесници во инцидентот. Станува збор за мажи на возраст од 48 и 49 години. Против нив е отворена постапка за физичко насилство и нарушување на јавниот ред и мир, а 48-годишниот маж бил задржан во полиција на 24 часа. Истрагата за случајот продолжува.

Романската ракометна федерација остро го осуди инцидентот. Претседателот Богдан Воина и раководството побараа итно свикување на Управниот одбор, а случајот беше испратен и до Дисциплинската комисија.

Од федерацијата потенцираа дека нивната политика за заштита на децата се темели на безбедност, интегритет, достоинство и благосостојба на младите спортисти, со нулта толеранција кон секој облик на насилство.