Во второто коло од машката кадетска лига во двете групи беа постигнати вкупно 391 гол. Мартин Димоски му донесе реми на Прилеп во последните секунди, Филип Коцев го реши трилерот во Кавадарци, а Новак Вељановски беше најефикасен во колото со 16 погодоци.
На седумте натпревари беа забележани пет гостински победи, еден домашен триумф и едно реми. Еурофарм Пелистер и Младост се единствените екипи со по две победи по првите две кола.
ГРУПА А
Димоски го спаси Прилеп, Вељановски постигна 16 гола
Прилеп и Еурофарм Пелистер 2 ги поделија бодовите во највозбудливиот натпревар од групата А, кој заврши без победник – 28-28.
Прилеп подобро го започна натпреварот и во 26. минута поведе со 14-10, а на полувреме имаше предност од 15-13. Битолчани во вториот дел, при негатива од 18-15, направија серија од 5-0 и го свртеа резултатот на 20-18.
Домаќинот одговори и повторно поведе со 22-21, по што следуваше драматична завршница. Новак Вељановски од седмерец им донесе водство од 28-27 на гостите во 59. минута, но Мартин Димоски, исто така од седум метри, на четири секунди до крајот ги постави конечните 28-28.
Вељановски постигна дури 16 од 28 гола на Еурофарм Пелистер 2, додека Благој Ристевски и Иван Светиев имаа по три. Кај Прилеп, Димоски постигна осум, Марко Ивцев седум, а Бојан Наскоски пет гола.
Коцев го реши трилерот во последната секунда
ГРК Тиквеш 2014 и Пролет 62 одиграа вистински трилер, кој гостите го добија со 26-25 благодарение на погодок постигнат точно на истекот од 60. минута.
На полувреме беше 11-11, а Пролет во продолжението поведе со 18-15 и 24-21. Кавадарчани не се предадоа и со серија од 3-0 израмнија на 24-24. Марио Поповиќ донесе ново водство за гостите, а Марио Ѓорѓиев на 36 секунди до крајот погоди за 25-25.
Кога се чинеше дека мечот ќе заврши без победник, Филип Коцев погоди во последната секунда и му ја донесе првата сезонска победа на Пролет. Поповиќ го заврши натпреварот со десет, а херојот Коцев со девет гола. Кај Тиквеш, Зоран Булуков и Филип Јанчев постигнаа по шест, додека Ѓорѓиев имаше пет погодоци.
Еурофарм Пелистер остана максимален
Еурофарм Пелистер ја забележа втората победа, откако славеше на гостувањето кај Струга со 21-15 и остана единствената екипа со максимални четири бода во групата А.
Битолчани на полувреме водеа со 11-8, а во 43. минута стигнаа до највисоки седум гола разлика, 16-9. Струга одговори со серија од 5-1 и се доближи на 14-17, но гостите во финишот постигнаа четири од последните пет гола.
Андреј Манџов и Дамјан Мартиновски постигнаа по четири гола за победничкиот тим, додека Даниел Христовски и Михаил Јовевски имаа по три. Кај Струга, Горазд Ојлески беше стрелец на пет, а Јордан Танаскоски на три гола.
Сино-белите го скршија отпорот на Преспа во вториот дел
Преспа 2025 одлично му парираше на тимот од Автокоманда во првото полувреме, но гостите во продолжението направија разлика и славеа со 37-28.
Домаќинот имаше водство од 8-5 и 13-10, но сино-белите се вратија и на паузата заминаа со минимални 18-17. Гостите го започнаа вториот дел со серија од 3-0, а потоа постепено ја зголемуваа предноста. Во финишот, при резултат 32-27, направија уште една серија од 4-0 и ги решија сите дилеми.
Калин Краљевски постигна 11 гола за победникот, Мартин Грашески имаше шест, а Владимир Николовски и Лука Георѓиевски по пет. Кај Преспа блескаше Виктор Ѓорѓиевски со 13 погодоци, додека Александар Волкановски постигна осум.
Резултати – група А, 2. коло:
Струга – Еурофарм Пелистер 15-21 (8-11)
Прилеп – Еурофарм Пелистер 2 28-28 (15-13)
Преспа 2025 – Алкалоид 28-37 (17-18)
ГРК Тиквеш 2014 – Пролет 62 25-26 (11-11)
ГРУПА Б
Вардар постигна 53 гола во Штип
Вардар ја забележа најубедливата победа во второто коло, откако на гостувањето кај Текстилец славеше со 53-17.
„Црвено-црните“ поведоа со 3-0, во десеттата минута имаа 7-2, а до 27. минута стигнаа до убедливи 21-5. На полувреме беше 23-7, додека во вториот дел скопјани постигнаа уште 30 гола.
Стефан Антевски беше најефикасен кај Вардар со седум гола, Зоран Георгиевски постигна шест, а Давид Кузмановски, Лука Јакимовски и Никола Никчевиќ по пет. Кај Текстилец, Наум Коцев имаше пет, а Димитар Алексовски четири погодоци.
Младост го доби дербито и остана на врвот
Младост ја запиша втората победа, откако на домашен терен беше подобар од Македонија Ѓорче Петров со 35-23.
Натпреварот беше израмнет до резултат 6-6, а гостите потоа поведоа со 7-6. Следуваше клучна серија од 6-0 на Младост за пресврт и водство од 12-7. На полувреме домаќинот имаше 18-10, а во продолжението без поголеми проблеми ја задржа високата предност.
Антонио Каракабаков постигна 12 гола за Младост, Стојан Иванџиков десет, а Влатко Иванов шест. Кај Македонија Ѓорче Петров, Владимир Иванов исто така постигна 12 погодоци, додека Теодор Гиевски имаше четири.
Куманово со серија од 6-0 го сврте мечот во Велес
МРК Куманово триумфираше на гостувањето кај Гемиџии со 30-25, иако велешани во 20. минута имаа водство од 7-6.
Гостите во клучниот период постигнаа шест гола без одговор и поведоа со 12-7, а на полувреме имаа предност од 13-8. Во вториот дел Куманово стигна и до девет гола разлика, 20-11, по што Гемиџии успеа само да го ублажи поразот.
Михаел Милановски беше убедливо најефикасен со 14 гола, додека Дариан Николовски, Михаил Стојановски и Немања Цветковски постигнаа по четири. Кај Гемиџии, Андреј Јакимовски имаше седум, а Бојан Мартинов пет погодоци.
Резултати – група Б, 2. коло:
Гемиџии – МРК Куманово 25-30 (8-13)
Текстилец – РК Вардар 17-53 (7-23)
Младост – Македонија ЃП 35-23 (18-10)
▶▶▶ Добивај директно РАКОМЕТНИ ВЕСТИ на твојот мобилен телефон
Приклучи се на VIBER – https://abit.ly/viber-24rakomet . Со еден клик до сите вести.
