Додека првенствата низ Европа веќе се во полн ек, ракометните клубови во Босна и Херцеговина сè уште немаат датум за почеток на новата сезона. Најголем проблем има шампионот Извиѓач, кој за девет дена треба да го одигра првиот натпревар во групната фаза од Европската лига.
Неизвесноста околу почетокот на Премиер лигата на БиХ создава сериозен проблем за клубовите, а особено за Извиѓач од Љубушки, кој паралелно треба да ја започне европската сезона.
Административните проблеми и кризата во функционирањето на Ракометната федерација на БиХ доведоа до ситуација во која актуелниот шампион на 20 септември сè уште не знае кога ќе го одигра првиот домашен натпревар.
Тренерот Иван Џолиќ признава дека од федерацијата нема конкретни информации.
„Барем знаеме дека тие натпревари ќе ги играме“, порача Џолиќ, објаснувајќи дека во Љубушки во моментов целосно се насочени кон европските обврски.
Проблемот за шампионот на БиХ е уште поголем ако се погледне ситуацијата кај неговите европски ривали.
Извиѓач во групата Ц од Европската лига ќе игра против Шамбери, Кадетен Шафхаузен и ЧСМ Букурешт. Додека клубот од Љубушки сè уште чека официјален почеток на домашната сезона, неговите противници веќе имаат натпреварувачки мечеви зад себе.
Џолиќ како пример го посочува Шафхаузен, кој веќе одиграл пет првенствени кола. Според него, тоа автоматски им носи одредена предност на Швајцарците, но и на Шамбери и ЧСМ Букурешт, бидејќи нивните екипи веќе се во натпреварувачки ритам.
Тренерот на Извиѓач не е голем оптимист дека проблемот брзо ќе биде решен. Неговата проценка е дека во најдобар случај Премиер лигата би можела да започне кон крајот на септември или на почетокот на октомври.
Дополнителен проблем ќе биде распоредот. Колку подоцна почне домашното првенство, толку помалку слободни термини ќе имаат клубовите, особено оние кои паралелно настапуваат во Европа.
Извиѓач барем знае кога сигурно ќе излезе на терен. Според официјалниот распоред на ЕХФ, на 29 септември од 18:45 часот во Љубушки ќе го пречека француски Шамбери во првото коло од групната фаза на Европската лига.
Потоа следува гостување кај Шафхаузен на 6 октомври, а на 13 октомври Извиѓач ќе гостува кај ЧСМ Букурешт. Групната фаза продолжува во ноември, а последниот натпревар е закажан за 1 декември против Шамбери во Франција.
Во Љубушки имаа долги подготовки токму поради неизвесноста околу домашната сезона. Екипата одигра повеќе контролни натпревари, а освои и подготвителни турнири во Мостар и словенечки Ормож.
По одличната мината европска сезона, во која стигна до полуфиналето на Европскиот куп, Извиѓач оваа есен ќе настапува едно скалило погоре – во Европската лига. Минатата сезона беше елиминиран од Татабања во полуфиналето на ЕХФ Европскиот Куп, откако претходно ги мина Беса, Дуделанж, Тримо Требње и Карвина.
▶▶▶ Приклучи се на VIBER – https://abit.ly/viber-24rakomet
Добивај директно РАКОМЕТНИ ВЕСТИ на твојот мобилен телефон 📲.
Со еден клик до сите вести. 🤾
