Охрид за само седум дена освои два трофеи и двапати го совлада Вардар. По триумфот во Струга, тимот на Борис Ројевиќ славеше и на домашниот турнир „Крсте Андоновски“, но српскиот стратег веднаш го насочи вниманието кон следниот голем предизвик - Супер Купот и новата пресметка со „црвено-црните“.
Охрид го заокружи фантастичниот подготвителен период со уште еден трофеј. За само седум дена охриѓани двапати стигнаа до пехар, а во двете финалиња на спротивната страна беше Вардар.
По успехот во Струга, Охрид славеше и пред својата публика на „Крсте Андоновски“, со што испиша уште една убава страница во клупската историја.
Борис Ројевиќ, сепак, не дозволува еуфоријата да го тргне фокусот од она што следува.
„За седум дена имаме две победи над Вардар и два освоени трофеи. Тоа досега не му се случило на Охрид и нормално е да бидеме задоволни“, порача Ројевиќ по финалето.
Трофеите се тука, но Ројевиќ гледа многу грешки
Финалето беше уште една тешка пресметка меѓу двата македонски ривали, а и двете екипи влегоа во мечот со замор и со одредени калкулации во составот по големиот број натпревари во краток период. За Ројевиќ токму тука почнува следната работа.
„Имаме многу грешки кои мораме да ги поправиме преку тренинг. Тоа е она што ни недостига во овој период – време за тренинг и за корекција на работите што не се добри“, потенцира тренерот на Охрид.
Распоредот, сепак, не му остава многу простор. Пред Охрид следуваат нови патувања и нови натпревари, а вистинскиот тренажен процес повторно ќе биде ограничен.
Токму на тоа Ројевиќ предупредуваше и во текот на турнирот – натпреварите се корисни, но за да се поправат слабостите на тимот потребни се и тренинзи.
Повторно Вардар – овојпат за дуел од Супер Купот
Двете победи и двата трофеи сигурно ќе ја подигнат самодовербата на Охрид, но следната пресметка со Вардар ќе има поинаква тежина. На маса ќе биде официјален трофеј – Супер Купот.
Ројевиќ не сака неговите играчи да помислат дека двете победи во подготвителниот период значат дека истиот рецепт автоматски ќе функционира и следниот пат. Напротив.
„Сакам да разговарам со моите момци и да им објаснам дека во Суперкупот сите ќе мораме да дадеме 20-30% повеќе за да можеме рамноправно да му парираме на комплетен Вардар“, изјави Ројевиќ.
Два трофеи – а сезоната сè уште не е почната
Охрид зад себе има исклучително успешен летен период. Два турнири, два трофеи и две победи над актуелниот македонски шампион се одлична најава за сезоната, но Ројевиќ многу добро знае дека официјалните натпревари ќе донесат сосема поинаков притисок.
Затоа победите во Струга и Охрид треба да бидат потврда дека екипата оди во вистинска насока, но не и причина за опуштање.
Следниот тест повторно ќе биде Вардар. Само што овојпат нема да станува збор за подготвителен турнир. Ќе се игра за официјален трофеј – а Ројевиќ веќе најави дека од своите играчи ќе бара уште повеќе.
