Кент Робин Тонесен се соочува со сериозен здравствен проблем, болеста му го зафатила и окото.
Германскиот Фленсбург ќе биде без еден од своите најискусни ракометари на неодреден период. Норвешкиот десен бек Кент Робин Тонесен има сериозни здравствени проблеми, откако му беше дијагностициран херпес зостер (предизвикан од истиот вирус што предизвикува овчи сипаници) на лицето, кој го зафатил и окото.
Од клубот ја потврдија информацијата, но засега не можат да прогнозираат кога 34-годишниот ракометар ќе може повторно да се врати на терените.
Станува збор за офталмолошка форма на херпес зостер, која доколку не се лекува навремено може да предизвика сериозни компликации, вклучувајќи воспаление на рожницата, конјунктивата и мрежницата, па дури и трајно оштетување на видот.
Поради ризикот од компликации, во Фленсбург не сакаат да брзаат со неговото враќање, туку приоритет е целосното закрепнување на искусниот Норвежанец.
Тонесен е еден од најважните играчи во ростерот на Фленсбург и неговото отсуство може да претставува сериозен удар за германскиот клуб во пресрет на новата сезона.
