Македонскиот вицепрвак Еурофарм Пелистер денеска ја дозна групата во Лигата на Европа. Битолчани ќе се соочат со германскиот Гумерсбах, шпанската Ла Риоха и полскиот Вибжеже Гдањск.

Тренерот на германскиот тим, легендарниот Гудјон Валур Сигурдсон, истакна дека неговиот тим го очекуваат интересни натпревари, а посебно го издвои гостувањето во Битола.

„Ова е многу интересна група и се радуваме на сите три противници. Ќе биде возбудливо да патуваме во Битола, бидејќи тоа е една од најжешките ракометни арени во Европа“, изјави Сигурдсон.

Прво и вторпласираната екипа ќе продолжат во елиминациите од Лигата на Европа, каде ќе играат 28 екипи.

„Имаме интересна група и едвај чекам натпреварите да започнат“, порача тренерот на Гумерсбах.

Групната фаза од Лигата на Европа ќе се игра од 29 септември до 1 декември, а секоја екипа ќе одигра по шест натпревари – три на домашен и три на гостински терен.

Македонската репрезентативка Матеа Чурлиновска на само 20 години реши да ја заврши играчката кариера.

Во емотивно писмо објавено на социјалните мрежи, прилепчанката откри дека ракометот по осум години нема повеќе да биде дел од нејзиниот живот.

Кариерата на Чурлиновска одеше по нагорна линија со голема брзина. Нејзините почетоци се во родниот град Прилеп, а потоа беше дел од Куманово, Ѓорче Петров и Атлетик, со кој минатата сезона обезбеди промоцијата во женската елитна конкуренција во Македонија.

20-Годишната голманка имаше активен договор со Атлетик до 2029 година, но нема да го одработи до крај.

Зад себе има настапи за кадетска, младинската и сениорската репрезентација. Беше дел од селекцијата што го освои ЕХФ шампионатот за кадетки во Литванија во 2021 година, потоа играше на кадетското СП и младинското СП во Македонија во 2022, односно 2024 година, а беше дел и од сениорската репрезентација на ЕП 2022 и ЕП 2024.

Португалскиот гигант Спортинг Лисабон полека се подготвува за ерата во клубот откако ќе заминат браќата Франциско и Мартим Кошта во 2027 година.

Тимот од Лисабон ги ангажираше 16-годишните близнаци Енцо и Салвадор Сантос, кои од сезоната 2026/27 ќе бидат дел од академијата на клубот и ќе се подготвуваат за влезот во првата екипа.

Двајцата таленти доаѓаат од островот Мадеира, каде настапуваа за Левада, а сега се селат во Лисабон со цел да го продолжат својот ракометен развој во зелено-белиот дрес.

Енцо настапува на левата бековска позиција, додека неговиот брат близнак Салвадор е десен бек, па португалските медиуми веќе започнаа да ги споредуваат со Франциско и Мартим Кошта.

„Станува збор за двајца чисти таленти. Иако се уште се многу млади, имаме услови да го забрзаме нивниот развој. Вакви играчи не се гледаат често во Португалија. Постојано размислуваме за иднината и веруваме дека тие можат да станат многу важни делови од Спортинг. Нашата цел е да создадеме играчи од врвна класа кои ќе придонесат не само за клубот, туку и за португалскиот ракомет“, изјави од Спортинг.

Со ангажманот на Енцо и Салвадор Сантос, Спортинг уште еднаш потврдува дека сериозно вложува во развојот на младите ракометари, со амбиција тие во иднина да прераснат во носители на играта на клубот и на португалската репрезентација.

Новиот суперлигаш Ѓорче Петров 2 полека го комплетира составот со кој ќе се натпреварува претстојната сезона во елитната конкуренција.

Младата Меланија Јовановска e нова членка на младите „лавици“ и ќе игра за составот предводен од Милева Велкова. Јовановска во Ѓорче Петров 2 доаѓа од составот на Куманово.

Претходно потписи на договорите ставија Антонела Ѓероска, Миа Маринчов, Марија Димоска и Бојана Георгиевска, средните бекови Jана Петровска, Михаела Димитриевска и Ева Ѓорѓиевска, пивотите Мирјана Наумоска и Симона Блажеска, десниот бек Тара Аврамоска, десните крила Бојана Паловска и Сара Ристовска, левото крило Теодора Спасоевска, како и голманките Дарија Наумоска, Софи Гошевска и Сара Илиоска.

Ѓорче Петров 2 го освои второто место во Првата лига и се врати во суперлигашката конкуренција по триумфот над Пелистер во бараж пресметката.

____________________________________________________________________________________________________
Добивај директно вести на твојот мобилен телефон, приклучи се на Viber групата на семејството на 24Ракомет. Со еден клик до сите ракометни вести.
_____________________________________________________________________________________________________

Машката младинска репрезентација на Македонија денеска го стартува разигрувањето за пласман од 17 до 24 место.

Од 13:30 часот, избраниците на Игор Илиевски ќе се соочат со Турција, која имаше еден одличен резултат во групната фаза и ја совлада Србија.

Ако слави, Македонија оди во битка за пласман од 17 до 20 место против победникот од дуелот меѓу Полска и Босна и Херцеговина.

Во случај на неуспех, нашите ракометари ќе играат со поразениот од претходниот двобој во битка за пласман од 21 до 24 место.

Македонија веќе го има обезбедено својот пласман на Мундијалот како домаќин, без разлика на освоената позиција на ова ЕП.