Европската ракометна федерација ги објави екипите што се пријавија во ЕХФ Европскиот Куп кај дамите за новата сезона.
Ќе играат вкупно 54 екипи, меѓу кои и две екипи од Македонија – вицепрвакот Чаир и третопласираната екипа на Вардар.
Вардарки по пет сезони се враќаат назад во Европа, и ќе стартуваат од второто коло во ЕХФ Купот заедно со уште 43 други екипи. Избраничките на Даниела Новеска ќе бидат во првиот шешир пред ждрепката.
„Црвено-црните“ имаат 22 можни ривали, а за старт убаво е да се избегнат тимовите од Фарски Острови и Португалија (Х71, Неистин, Алмеида), не поради квалитетот, туку поради далечните патувања, но и првакот на МОЛ Лигат – Дунајска Стреда од Словачка, како и холандските Квинтус или Јуро Унирек – последниот тим со кој играа вардари во Европа во 2021 година.
Убаво би било Вардар да ги добие за ривал од Косово (Феризај, Истогу и Шќипоња), Босна и Херцеговина (Крајина Ќазин, Криваја), Кипар (Мавроматис, АПОЕЛ), Србија (Рума) или пак Грција (Атинаикос).
Можни ривали се и израелските Холон и Макаби Рамат Ган, но тие се уште немаат дозвола за играње дома, па двапати би играле во Скопје. Тука се литванските Егле Вилнус и Жалгирис Каунас, како и Диферданж од Луксембург, кои исто така влегуваат во групата на посакувани противници.
Во групата „ни ваму, ни таму“, ќе ги ставиме тимовите на Бриксен од Италија и Цуг од Швајцарија. Натпреварите од второто коло ќе се играат на 3/4 и 10/11 октомври, а ждрепката ќе се одржи на 14 јули од 11:00 часот.
