По двете возбудливи полуфиналиња во Келн, дојде моментот за големото финале на Лигата на шампионите. Вечерва за европската титула ќе се борат Барселона и Фуксе Берлин.
За Берлин ова е втора последователна финална пресметка на Ф4 турнирот. Германскиот тим минатата година загуби од Магдебург со 32-26, а сега има можност за првпат во својата историја да стане европски шампион.
До финалето Берлин стигна откако во полуфиналето го совлада токму Магдебург со 40-35, а клучна улога во победата имаше голманот Дејан Милосављев со неколку важни одбрани во завршницата.
На спротивната страна е Барселона, која ќе игра за својата 12. титула во Лигата на шампионите. Каталонците во полуфиналето по продолженија го совладаа Алборг со 37-32, а најзаслужен за триумфот беше Алеиш Гомез, кој постигна осум гола.
Барселона досега има освоено рекордни 11 титули и деветпати играла финале на Ф4 турнирот, додека Берлин сè уште го чека својот прв европски трофеј.
Интересен е и податокот дека ниту еден германски тим досега не загубил финале на Ф4 од клуб кој не е од Германија. Единствените германски екипи кои останале без титулата во Келн се Кил во 2014 година и Берлин минатата сезона – и во двата случаи од германски ривали.
Во пресрет на финалето, прв стрелец на натпреварувањето е данската ѕвезда на Берлин, Матијас Гидсел, со 153 погодоци, додека кај Барселона најефикасен е Алеиш Гомез со 111 гола.
Пред големото финале ќе се одигра и натпреварот за третото место меѓу Магдебург и Алборг.
ДЕНЕСКА НА ТЕРЕНИТЕ:
15:00 АЛБОРГ – МАГДЕБУРГ (ЛИГА НА ШАМПИОНИ)
18:00 БАРСЕЛОНА – ФУКСЕ БЕРЛИН (ЛИГА НА ШАМПИОНИ)
