И покрај фантастичните 12 гола на Франциско Кошта, Спортинг Лисабон не успеа да дојде до својата прва победа во четвртфиналето од Лигата на шампиони. Во самиот финиш, Бустер Јул Ласен од пенал го спаси Алборг од пораз, поставувајќи конечни 31-31, па реваншот во Данска ќе започне од „нула“.
Натпреварот беше израмнет од самиот старт, а единственото водство на Спортинг во првиот дел беше 2-1. Данскиот тим ја презеде контролата, но не успеа да се одлепи на повеќе од три гола разлика. Предводен од Кошта, кој постигна шест гола до паузата, домашниот тим направи камбек и со серија три гола израмни на полувреме (16-16).
Во второто полувреме, Спортинг направи силна серија од 6-1 и поведе со 22-17, при што блескаа браќата Мартим и Франциско, а значаен придонес имаше и голманот Андре Кристенсен со неколку важни одбрани.
Сепак, Алборг се врати во игра, ја подобри реализацијата и преку расположените Томас Арнолдсен и Мадс Хоксер чекор по чекор ја намали негативата. Данскиот шампион израмни на пет минути до крајот, па следуваше драматична завршница.
Кога Франциско Кошта погоди на 50 секунди до крајот, изгледаше дека Спортинг ќе слави, но пеналот на Јул Ласен во последните моменти донесе реми за гостите.
Натпреварот беше вистинска офанзивна пресметка, со брз ракомет и многу контранапади, додека одбраната беше во втор план. Единствениот голман со поголемо влијание беше Кристенсен, кој во еден период му донесе значајна предност на својот тим.
Младите играчи беа во центарот на вниманието, браќата Кошта кај Спортинг, како и Арнолдсен, Хоксер и Кнор кај Алборг. Темпото беше исклучително брзо, но тоа донесе и многу грешки.
____________________________________________________________________________________________________
Добивај директно вести на твојот мобилен телефон, приклучи се на Viber групата на семејството на 24ракомет. Со еден клик до сите ракометни вести.
_____________________________________________________________________________________________________
