Европските првенства во ракомет со децении ги истакнуваат и најдобрите голгетери на континентот, а меѓу нивното друштво се наоѓа и еден Македонец – Кирил Лазаров. Актуелниот селектор на Македонија е дел од елитната листа на најдобри стрелци во историјата на Европските првенства, рамо до рамо со некои од најголемите имиња што некогаш играле на ова натпреварување.
На листата е исто така и Иван Чупиќ, кој е актуелен тренер на Вардар, а исто така беше дел од златната генерација на „црвено-црните“ кои трипати играа на Ф4 во Келн и двапати беа европски прваци. Тој како дел од репрезентацијата на Хрватска е нејзин најдобар стрелец и има четири медали од ЕП.
Лазаров со своите голови остави длабока трага на Европските првенства и се наоѓа меѓу најдобрите десет стрелци на сите времиња. Неговиот учинок е уште поголем ако се земе предвид континуитетот и фактот дека со години беше главната напаѓачка сила на македонската репрезентација, често носејќи ја на своите плеќи против европските велесили.
На врвот на листата се наоѓа Данецот Микел Хансен, кој е апсолутен рекордер по број на постигнати голови на Европските првенства. Веднаш зад него е Французинот Никола Карабатиќ, додека третото место му припаѓа на исландската легенда Гудјон Валур Сигурдсон. Овие имиња со години доминираа на европската сцена и поставија стандарди кои тешко се достигнуваат.
НАЈДОБРИ СТРЕЛЦИ ВО ИСТОРИЈАТА НА EП
1 Микел Хансен (Данска) – 296 гола
2 Никола Карабатиќ (Франција) – 295 гола
3 Гудјон Валур Сигурдсон (Исланд) – 288 гола
4 Штефан Ловгрен (Шведска)- 203 гола
5 Сандер Сагосен (Норвешка) – 190 гола
6 Иван Чупиќ (Хрватска) – 188 гола
7 Ларс Кристијансен (Данска) – 188 гола
8 Лук Абало (Франција) – 185 гола
9 Олафур Стефансон (Исланд) – 183 гола
10 Кирил Лазаров (Македонија) – 182 гола
