Пивотот на Загреб, Патрик Валчак, по повеќе од една година пауза повторно изрази подготвеност да игра за полската репрезентација.
Валчак во септември 2024 соопшти дека поради здравствени и лични причини става крај на настапите за „бело-црвените“, но сега вели дека е спремен за камбек.
„Разговарав со селекторот. Ако ме види во плановите и репрезентацијата има потреба од мене, ќе дојдам на следниот собир и ќе дадам 100 отсто“, рече Валчак, кој од сезоната 2023/24 настапува за Загреб.
Иако беше на листата на резерви за собирот во претходната ЕХФ недела, селекторот Хота Гонзалес поради повреди на Мачеј Гембала и Давид Давиџик, се реши да го повика Виктор Јанковски од Вардар.
Јанковски летово дојде во Вардар и целиот товар на пивотменската позиција падна на него по повредата на Лазаревски. Полјакот остави одличен впечаток и веднаш беше забележан и од селекторот на Полска.
За ситуацијата со Валчак, селекторот Гонзалес појасни дека ќе го има во предвид за наредните собири.
„Со Патрик зборував летоска, знам дека е подготвен и го имам предвид. Сега сакав да видам и помлади играчи. Валчак е искусен и јасно ми е што може да понуди, не исклучувам повик на следните собири – ќе зависи од формата.“
Валчак дебитираше за сениорската Полска во јануари 2017 и има зад себе 86 натпревари и 71 гол. Играше на СП 2017, СП 2021, ЕП 2022 и СП 2023. Последниот репрезентативен настап му беше пријателскиот меч со Аргентина во декември 2023.
