Селекторот на машката репрезентација на Италија, Рикардо Трилини, го објави списокот за последната фаза од подготовките пред настапот на Светското првенство 2025.
Трилини смета на 18 ракометари, а неизвесни за настап на Мундијалот се двајцата клучни играчи – капитенот Андреа Парасини и Марко Мењон.
Двајцата ракометари се уште се рехабилитираат од повредите и наскоро би требало да се знае дали ќе настапат на СП, а селекторот на ,,азурите” е голем оптимист и ги смести двајцата на списокот за последната фаза од подготовките.
Италија пласманот на СП го обезбеди откако ја елиминираше Црна Гора во бараж двомечот, а сега ќе има тежок предизвик. Избраниците на Трилини за ривали во групната фаза ги имаат репрезентациите на Данска, Тунис и Алжир.
Репрезентацијата на Италија последната подготвителна фаза ќе ја мине во Германија, таму ќе одигра уште неколку пријателски натпревари пред заминувањето за данскиот град Хернинг.
