Босанскиот десен бек Недим Хаџиќ е најновото засилување за хрватскиот првак Загреб, пишува „Германијак“.

Хаџиќ доаѓа во хрватската престолнина на местото на Михајло Радојковиќ, кој не ги исполни очекувањата на раководството и најверојатно ќе го засили Партизан.

Станува збор за актуелен репрезентативец на Босна и Херцеговина, кој пред сениорската ги мина и сите младински селекции на оваа држава.

Со Загреб треба да потпише договор до летото 2026 година и да биде поддршка за Лука Ловре Кларица.

Хаџиќ пред Борац настапуваше за Маглај, а значаен дел од кариерата мина во Германија каде беше дел од Софлинген, Штутгарт, вториот тим на Вецлар и Ратинген.

Ракометарите на Металург РА запишаа нова победа во прволигашката конкуренција, откако славеа против Астраион со убедливи 49-25.

Гостите водеа само со 2-0 на стартот на мечот, а потоа се беше во знакот на домашните ракометари, кои до паузата направија плус 13, па вториот дел беше само формалност.

Најдобри стрелци во победничкиот тим беа Бојан Поповски и Лука Савовски со по девет погодоци, додека кај Астраион се истакна Кире Георгиев со 11 погодоци.

Металург РА сега има 10 на четвртото место во групата А и практично го има обезбедно место во плеј-офот, додека струмичани се последни без ниту еден освоен бод оваа сезона.

Драчево исто така прослави убедлива победа, откако избраниците на Велимир Настески беа подобри од Преспа Вардар со 43-28.

Ресенчани парираа до 6-6, а потоа домаќините ја преземаа контролата на теренот и само ја полнеа гостинската мрежа, па до крајот немаше никаква неизвесност.

Најдобри стрелци кај победникот беа Димитар Петковски и Лазар Стојанов со по осум гола, додека кај Преспа Вардар, по пет пати реализираа Иван Костовски и Александар Димитриевски.

Драчево сега има 12 бода на петтото место во групата Б и се наоѓа пред пласман меѓу најдобрите во плеј-офот, додека Преспа Вардар е последна без бодови.

Амбициозниот Партизан од Белград продолжува да биде активен на трансфер пазарот во регионов, а според информациите на „Моцарт спорт“, српскиот суперлигаш би можел да биде посилен со играч од Еурофарм Пелистер.

Станува збор за привремениот репрезентативец на БиХ, Павле Петровиќ, кој во Македонија пристигна уште во јануари, 2021 година, најпрво играше за вториот тим на битолскиот клуб, потоа беше „прекомандуван“ во првиот тим.

Десниот бек во минатата сезона имаше забележителни партии во Лигата на шампионите, најдобрата ја имаше во Данска против силниот Алборг запишувајќи седум гола, но во оваа сезона е во сенка на Усама Хосни и Нејц Цехте, двајца клучни ракометари во играта на „зелено-белите“.

Партизан, моментално, на позицијата десен бек ги има на располагање Никола Црноглавац и Немања Јовиќ, ракометар кој што може да одигра и како десно крило, па така можната преселба на Петровиќ би била добитна комбинација за српскиот тим.

Освен Петровиќ, порталот „Моцарт спорт“ како потенцијално засилување во Партизан го споменува 29-годишниот Михајло Раденковиќ. Искусниот ракометар, исто како и Павле Петровиќ, доколку го засилуваат Партизан, тогаш тоа ќе биде на полусезона.

Минатата недела во Партизан пристигна црногорскиот репрезентативец Стеван Вујовиќ, кој игра на позицијата лев бек, а претходно клубот се засили со Петар Ѓорѓиќ од најголемиот ривал – Војводина. За Партизан настапува левото крило од Македонија, Бојан Маџовски.

Екипата на Младост Богданци со победата над Македонија ЃП од 36:30 го презеде првото место во групата Б од прволигашката конкуренција.

За тимот од Богданци ова беше 7-ми сезонски триумф во новата натпреварувачка сезона, со новите два бода дојде до 14 на свое конто, исто толку има и Скопје, додека Македонија ЃП остана на бод помалку – 13.

Домаќините на полувреме имаа предност од 16:13, а во вториот дел дојдоа до поизразена разлика, која на крајот изнесуваше шест гола. Гостите во првото полувреме парираа колку што можат и колку им дозволуваше домашниот тим, но во вторите 30 минути Младост константно беше во солидна предност.

Најефикасни во победничката екипа со по шест гола беа Димитар Пеев и Антонио Николоски. Во поразениот табор се истакна Бојан Божиновски со осум гола, а го следеше Никола Иванов со седум реализации.

Младост Богданци во следното коло е слободен, а Македонија ЃП против Партизан ќе бара рехабилитација за денешниот пораз.

По Жоан Кањелас и Виран Морос, кој замина во пензија ова лето, уште еден шпански ветеран по крајот на оваа сезона ќе престане со активно играње ракомет.

Станува збор за 40-годишниот лев бек Роберто Гарсија Робледо, кој во моментов е дел од тимот на Гранољерс.

За националниот тим на Шпанија, Робледо одигра 103 натпревари и постигна 205 погодоци, а освои пет медали на големите натпреварувања – злато на СП 2013, бронза на ЕП 2014, сребро на ЕП 2016, бронза на ОИ 2020 и сребро на ЕП 2022.

Низ богатата кариера, освен за матичниот Гранољерс, каде ја почна и ќе ја заврши кариерата, играше за Адемар Леон, ПСЖ, ПИК Сегед, Колдинг, Барселона, ЧСМ Букурешт и Нант.